Gürcüstanda 2 azərbaycanlı deputat seçildi
2 Oktyabr 2012 13:23 (UTC+04:00)
Əli Məmmədov adlı soydaşımız seçki marafonundan
böyük səs çoxluğu ilə qalib çıxıb. Bu barədə Modern.az saytına
Gürcüstan parlamentinin üzvü Azər Süleymanov məlumat verib.
Deputatın sözlərinə görə, Gürcüstanda keçirilən parlament
seçkilərinin ilkin nəticələrinə görə, 2 azərbaycanlı namizəd
parlamentdə təmsil olunmaq hüququ qazanıb: biri özüdür, biri də Əli
Məmmədov.
"Dünənki seçkilər çox normal, demokratik
keçirildi. Sözün açığı biz seçkilərin belə keçəcəyini gözləmirdik.
İlkin nəticələr artıq bəllidir. Mən namizədliyini irəli sürdüyüm
bölgə üzrə 47 min səsdən 35 minini toplamışam. Bu artıq mənim
qələbəm deməkdir. Bu il Gürcüstanda ilk dəfə idi ki, daha bir
azərbaycanlı seçkilərə müxalifətdən qatılmışdı. Əli Məmmədov adlı
həmin azərbaycanlı da Marneuli rayonu üzrə qalib gəldi. O,
müxalifətin proporsional siyahısında 32-ci yerdədir. Hələlik biz
ikimiz parlamentdə təmsil olunmaq hüququ qazanmışıq. Amma rəsmi
nəticələr ən tezi 15 gün ərzində bəlli olacaq", - deyə A.Süleymanov
parlament seçkilərini şərh edib.
Müxalifətin qalib gəlməsi barədə deyilənləri
birmənalı olaraq təsdiqləməyən iqtidar nümayəndəsi A.Süleymanovun
sözlərinə görə, Gürcüstanda seçkisonrası ümumi vəziyyət
qənaətbəxşdir.
"Dünən seçki başa çatandan sonra iqtidar
təmsilçiləri ilə müxalifət nümayəndələri görüşüb bir-birlərini
təbrik etdilər. Təbii ki, hər bir Gürcüstan vətəndaşı kimi bizim
üçün kimin qalib gəlməsi önəmli deyil, əsas odur xalq qalib gəlsin.
Seçkilərin nəticələri ilə bağlı Mərkəzi Seçki Komissiyası açıqlama
verərkən bildirdi ki, nəticələr 15 gündən sonra rəsmən məlum
olacaq. Hələlik ilkin ehtimallarda müxalifətin 70 faiz səs
topladığı bildirilir, amma bu, bir o qədər də inandırıcı
deyil".
Qeyd edək ki, dünən Gürcüstanda keçirilən
parlament seçkilərinin ilkin nəticələrinə görə, prezident Mail
Saakaşvilinimn rəhbəri olduğu Vahid Milli Hərəkat Partiyası
müxalifətə məğlub olub. "Eksit-poll"arın məlumatına görə, milyarder
Bidzina İvanişvilinin müxalif "Gürcü arzusu" bloku seçkilərdə
böyük say hesabı ilə qalib gəlib.