Dekabrda Azərbaycanda mobil cihazların qeydiyyat mərkəzi işə başlayacaq
9 Oktyabr 2012 16:06 (UTC+04:00)
Azərbaycan Nazirlər Kabinetinin
"Mobil cihazların qeydiyyatının aparılması Qaydası"nın təsdiq
edilməsi haqqında qərarına uyğun olaraq ölkə ərazisində mobil
cihazların qeydiyyat mərkəzi yaradılır.
"APA-ECONOMICS"in məlumatına
görə, rabitə və informasiya texnologiyaları nazirinin müavini
İltimas Məmmədov bununla bağlı qeyd edib ki, sözügedən mərkəz artıq
cari ilin dekabr ayında fəaliyyətə başlayacaq.
Qeyd edək ki, Rabitə və İnformasiya Texnologiyaları Nazirliyi
tərəfindən yaradılan mərkəzin məqsədi mobil cihazların qeydiyyat
sisteminin (MCQS) tətbiqidir. Mərkəzdə Azərbaycanın
telekommunikasiya şəbəkəsində istifadə olunan mobil cihazların, bu
qaydada nəzərdə tutulmuş texniki identifikasiya göstəriciləri
barədə məlumatların vahid baza sisteminə daxil edilməsi,
saxlanılması və emalı nəzərdə tutulub. Mərkəz işə düşdükdən sonra
MCQS vasitəsilə qeydiyyatsız, oğurluq və klon cihazların IMEI
(International Mobile Equipment Identification) kodları vasitəsilə
identifikasiya olunaraq mobil rabitə şəbəkələrində istifadəsi
məhdudlaşdırılacaq.
Xatırladaq ki, bu ilin fevral ayından Azərbaycanda mobil
operatorların şəbəkələrində mobil cihazların IMEI kodlarının
monitorinqinə başlanıb. IMEI kodların monitorinqi Azərbaycana
qeyri-leqal idxal olunan və ölkənin mobil rabitə şəbəkələrində
istifadə olunan mobil cihazları üzə çıxarmağa imkan verəcək.
Monitorinq nəticəsində saxta IMEI kodları olan mobil cihazlar da
aşkar olunacaq. Monitorinq zamanı aşkarlanmış qeydiyyatsız mobil
cihazların şəbəkədən istifadəsinin məhdudlaşdırılması nəzərdə
tutulub. Şəbəkədən məhdudlaşdırma prosesi MCQS-in istifadəyə
verilməsindən sonra aparılacaq.
Qeyd edək ki, IMEI - mobil cihaz üçün tək və bənzərsiz olaraq təsis
edilmiş beynəlxalq identifikasiyanı (eyniləşdirməni) göstərən
nömrədir. Mobil rabitə şəbəkəsində istənilən zaman kəsiyində
istifadə olunan (hətta bir saniyə belə) hər bir mobil cihazın IMEI
kodunu texniki olaraq monitorinq etmək və həmin mobil cihazın
istifadəsini məhdudlaşdırmaq olar.