Bakıda iki ərazidə sürüşmə nisbi aktivləşib-Açıqlama
16 Oktyabr 2015 16:00 (UTC+04:00)
"Bakı Beynəlxalq Avtovağzal Kompleksinin qarşısındakı sürüşmənin
baş verməsinə səbəb atmosfer çökünlərinin təsiri ola bilər. Amma
bununla belə həmin ərazidə tədqiqat aparılmalı, sürüşmənin
səbəbləri öyrənilməlidir. Hazırda həmin ərazidə aktivləşmə yoxdur.
Yarğan boyu bitum töküldüyündən elə anlaşılır ki, o ərazidə
sürüşmə aktivləşib. Əslində isə əvvəlki prosesdir". Bu sözləri
Movqe.az-a açıqlamasında Ekologiya və Təbii Sərvətlər Nazirliyinin
(ETSN) Milli Geoloji Kəşfiyyat Xidmətinin geoloji planlama
ekspedisiyasının dəstə rəisi Rafiq Həsənov bildirib. R. Həsənov
nisbi aktivləşmənin hazırda Abşeron rayonunun Masazır
qəsəbəsində və Bakının Suraxanı rayonu ərazisində, Zığ
qəsəbəsindəki sürüşmə sahələrində qeydə alındığını söyləyib. Onun
sözlərinə görə, Mazasırda sürüşməni aktivləşdirən səbəb ərazidə
olan "qır gölü"nə kanalizasiya sularının axıdılmasıdır.