TQDK nəşrlərinin saxtalaşdırılması ilə əlaqədar hüquq-mühafizə orqanlarına müraciət edib
23 Oktyabr 2012 12:24 (UTC+04:00)
"Son vaxtlar
müəyyən qüvvələr tərəfindən Tələbə Qəbulu üzrə Dövlət
Komissiyasının siniflər üzrə test kitablarının saxta nümunələrinin
qeyri-qanuni yollarla çapı və onların Bakı şəhərində, həmçinin
ölkənin digər şəhər və rayonlarında satışı təşkil
olunur".
Bu barədə APA-ya TQDK-nın
mətbuat xidmətindən bildirilib. Məlumatda qeyd olunub ki, saxta
nəşrlərdə ciddi elmi-metodiki səhvlərə yol verilir, materialların
məzmunu təhrif edilir və ya bunlar köhnəlmiş olur, yeni qəbul və
tədris proqramlarına uyğun gəlmir: "Çox vaxt saxta nəşrlərdə
köhnəlmiş, aktuallığını itirmiş və ya istifadədən çıxarılmış
materiallar yenidən çap edilərək satışa çıxarılır. Bir çox hallarda
saxta çap məhsulları hazırlanarkən komissiyanın buraxdığı son
nəşrlərin üz qabığından istifadə edilsə də, onların içərisi köhnə
nəşrlərin materiallarından ibarət olur. Bu isə istifadə edənləri
çaşdırır, özləri istəmədən belə onların hazırlıq prosesində,
təlimində səhvlərin meydana çıxmasına səbəb olur. Buna görə də
TQDK, abituriyentləri və onların valideynlərini, həmçinin orta
ümumtəhsil müəssisələrində çalışan müəllimləri həmin vəsaitləri
alarkən diqqətli olmağa çağırır. Orijinal nəşrləri saxta nəşrlərdən
fərqləndirmək mümkündür. Belə ki, orijinal kitablarda TQDK-nın
loqosu, fənnin adı və sinif yazıları qabarıq və ilişkənli formada
çap olunduğundan onları əl toxunuşu ilə eyni cür çap olunmamış
saxta nümunələrdən fərqləndirmək mümkündür. Onu da bildiririk ki,
yuxarıda qeyd olunan qeyri-qanuni əməllərin qarşısının alınmasında
lazımi inzibati tədbirlərin görülməsi üçün TQDK tərəfindən
hüquq-mühafizə orqanlarına müraciət olunub".