Yeni əfv gözlənilir
3 Dekabr 2012 17:28 (UTC+04:00)
Dünyadakı hər bir insan azad yaşamaq istəyir və hər bir fərdin azad
yaşamağa hüququ var. Lakin bu gün cəmiyyətimizdə törətdikləri
naqis, cinayətkar əməllər səbəbi ilə ömrünü həbsxana divarları
arasında keçirməyə məhkum edilmiş insanlar da var. Bu insanların
çoxunun bir arzusu var, o da azadlıqlarına qovuşmaq. Törətdikləri
əməllərdən peşman olan insanların cəzalarının çəkilməmiş
hissəsindən azad edilməsi Azərbaycan hökumətinin həyata
keçirmiş olduğu ən gözəl ənənələrdən biridir. Dəmir barmaqlıqlar
arasında əfv fərmanını gözləyən neçə-neçə insan var ki, Dünya
Azərbaycanlılarının Həmrəylik Gününün və Yeni ilin yaxınlaşması
onların ümidlərini daha da artırır.
Bəs bu il necə əfv gözlənilir? Prezidentə bununla bağlı hər hansısa
bir siyahı təqdim edilibmi?
Milli Məclisin Hüquq Siyasəti və dövlət Quruculuğu
Komitəsinin üzvü, millət vəkili Çingiz Qənizadə məsələ
ilə əlaqədar Mövqe. Az saytına açıqlama verib: "İlk əvvəl onu qeyd
edim ki, Dünya Azərbaycanlılarının Həmrəylik Günü ərəfəsində cənab
prezident mütəmadi olaraq hər il əfv fərmanı imzalayır. Biz hüquq
müdafiəçiləri olaraq bu addımı hər zaman yüksək qiymətləndirmişik
və alqışlamışıq. Buna bəzən dırnaqarası baxmaq istəyən insanlar
olur ki, niyə az sayda olur, niyə filankəslər olur? Lakin biz heç
bir fərq qoymadan neçə nəfərin, kimlərin əfv edilməsindən asılı
olmayaraq, bu cür humanist addımı həmişə alqışlamışıq. Çox arzu
edirik ki, cənab prezident bu ilin sonunda da növbəti dəfə
belə bir əfv fərmanını imzalasın. Qaldı siyahıların göndərilməsinə,
Hüquq Müdafiə Təşkilatlarının Monitorinq Qrupunun üzvü olaraq bizim
siyahıda olan şəxslərin adlarını əfv komissiyası ilə əlaqəli
müzakirə edib sənədlərimizi baxılması üçün Prezident
Administrasiyasına göndəririk. Hər dəfə cənab prezident bizim
siyahılar üzrə 5 nəfər, 10 nəfər, elə vaxt olub ki, 30 nəfərin əfv
olunmasına imza atıb. Bu dəfə də biz belə bir müraciət göndərmişik.
Ümid edirik ki, cənab prezidentimiz hər zaman olduğu kimi indi də
hüquq müdafiəçilərinin göndərdiyi siyahıya laqeyid qalmayacaq.
Siyahıda olan şəxslərin əfv olunması üçün sərəncam imzalayacaq. Bu
ildə də biz siyahı göndərmişik. Belə hesab edirik ki, bu məsələ
müzakirə predmetidir. Əfv gözlənilir".
Göndərilən siyahıda adı mediada və hüquq müdafiəçiləri tərəfindən
adlandırılan şəxslərin olmasına gəlincə, Çingiz Qənizadə bildirir:
"Biz insanları məşhurluğuna görə seçmirik. Belə hesab edirik ki,
məşhur olmaq heç kimə status yaratmır. Onların içərisində əfv
olmağa hüququ və haqqı olan insanların adları siyahıda göstərilir.
Siyahıda olanların adlarının açıqlanması bəzi şəxslərin ailə
üzvləri tərəfindən qısqanclıq ilə qarşılandığına görə ad
açıqlamırıq."