Müxalif düşərgədə yeni ziddiyyət yaranır
9 Dekabr 2012 10:28 (UTC+04:00)
Müxalifət daxilində gələn il baş tutacaq prezident seçkilərinə
münasibət heç də birmənalı deyil. Hələlik əksəriyyət prosesdə
iştirak edəcəyini bəyan edir. Hətta gedən proseslərdən müxalifətdən
olan namizədlərin çoxsaylı ola biləcəyini də düşünmək olar.
Düzdür, son zamanlar bu düşərgədə müxalifətin vahid namizədinin
olmasının vacibliyi də önə çəkilir. Demək olar hər bir müxalifət
təşkilatı mətbuata açıqlamalarında vahid namizədlə getməyin daha
yaxşı olduğunu bəyan edirlər. Amma işdə görünən odur ki, müxalifət
düşərgəsində vahid namizədlik məsələsi alınan deyil. Son zamanlar
isə iqtidar opponentləri arasında boykot məsələsini də gündəmə
gətirənlər üzə çıxıb. Həmin qrup əvvəlki taktikalarına istinad
edərək boykot adını çəkməklə guya hakimiyyətə müəyyən təzyiqlər edə
biləcəklərini düşünürlər. Özü də boykot taktikasından dəm vuranlara
arasında AXCP təmsilçiləri daha çox üstünlük təşkil edirlər. Bu
yaxınlarda mətbuata açıqlamalarında AXCP Ali Məclisinin sədri Həsən
Kərimov da boykot taktikasının baş verə biləcəyini istisna
etməyib.
Bunun əksinə olaraq İctimai Palatada AXCP ilə bir yerdə olan
Müsavat isə seçkilərdə iştirakda maraqlıdır. Bu günlərdə Müsavat
başqanı İsa Qəmbər də boykot taktikasının baş tutan olmadığına bir
işarə vurub. Vaxtilə də müxalifət bu və ya digər seçkiləri boykot
edəcəklərini bəyan etmişdilər. Amma seçkilərin nəticəsi heç də
radikal müxalifətin istəyinə uyğun şəkildə baş vermədi. İndiyə kimi
olan seçkilərdə əhalinin əksər hissəsinin seçkilərə qatılaraq
səsvermə prosesində iştirak etməsi Azərbaycan üçün boykot
taktikasının keçərli olmadığını sübut etdi. Amma AXCP sədri hələ də
bu qaçılmaz amili dərk edə bilməyib və yaxud da dərk edibsə də,
boykota getməklə düşünür ki, özünün hazırkı iqtidar qarşısında
məğlub olacağını bu yolla ört-basdır edə bilər. Digər tərəfdən,
belə fikirlər səslənir ki, Müsavat başqanı İsa Qəmbər vahid namizəd
olsa, Əli Kərimli seçkiləri boykot edəcək. Hazırda İctimai Palatada
Əli Kərimli ilə İsa Qəmbərin vahid namizəd olması məsələsində gizli
və açıq şəkildə mübarizə gedir. Hansı ki, seçkilər yaxınlaşdıqca bu
mübarizənin daha da kəskinləşəcəyini gözləməyinə dəyər. Verilən
məlumatlara görə indiki məqamda İctimai Palatada boykot məsələsində
qüvvələr nisbəti bir qədər Müsavat başqanının xeyrinə dəyişib. Belə
olan halda isə İP-nin vahid namizədinin, hətta Əli Kərimlinin
dediyi kimi praymeriz yolu ilə müəyyənləşməsi zamanı belə, Müsavat
başqanının onu üstələyəcəyi təhlükəsi yaranıb. Görünür, AXCP sədri
bu təhlükəni duyduğundan özünü sığortalamaq üçün boykot amilini
ortaya atır. Digər tərəfdən, Müsavat başqanının İP-in vahid
namizədi olması fonunda AXCP-nin seçkiləri boykot etməsi həm də
müttəfiqinə qarşı hörmətsizlik, onu daha ağır vəziyyətdə qoymaq
kimi yozulacaq. Nəinki yozulacaq, ən həssas bir məqamda müttəfiqini
yolun ortasında qoyub qaçmaq sözün həqiqi mənasında ona qarşı
ediləcək ən böyük hörmətsizlik kimi qəbul olunacaq.
Bu arada qeyd edək ki, Əli Kərimlinin "seçki yolu müxalifətin vahid
namizədi seçilsin" təklifinə partiya sədrlərinin etirazları davam
edir. Məsələyə bir sıra partiya sədrləri, millət vəkilləri,
siyasətçilər münasibət bildirərək bunun qeyri-mümkün və gülməli
olduğunu bildirdilər.
Müxalifətin boş xəyallarla uzun illərdir baş aldatdığını deyən
Sosial-Demokrat Partiyasının həmsədri Araz Əlizadə bildirib ki,
onların belə təklif səsləndirməsi artıq bir neçə dəfə təkrarlanıb:
"Əvvəla, desinlər görək bu seçkini kim keçirəcək və necə keçirəcək?
Bəs bunun pulunu kim verəcək? Əgər bu seçki keçirilsə, onda gərək
bütün Respublika üzrə keçirilsin. O zaman bilirsiniz bu nə qədər
pul tələb edir? Bu qeyri-real bir şeydir. Müxalifət son 20 ildə bir
dəfə də real təklif irəli sürməyib. Onların bütün təklifləri
xəyaldır".