Naxçıvan MTN bəyanat yaydı
10 Dekabr 2012 14:27 (UTC+04:00)
Naxçıvan Muxtar Respublikası Milli Təhlükəsizlik Nazirliyinin (MTN)
mətbuat xidməti özünü "Naxçıvan MTN-in əməkdaşı" kimi təqdim edən
İbrahim Musayevin "Azadlıq" qəzetində dərc olunan açıqlamaları ilə
bağlı bəyanat yayıb.
Nazirliyin mətbuat xidmətindən KIV-ə verilən bəyanatda bildirilir
ki, son günlər "Azadlıq" qəzeti və ona istinadən bəzi KIV-də
Naxçıvan MR MTN haqqında böhtan xarakterli, həqiqətəuyğun olmayan,
ölkə ictimaiyyətini aldatmağa, siyasi dividentlər və maddi qazanc
əldə etməyə hesablanmış məlumatlar yayılır. Açıqlamada daha sonra
deyilir: "Özlərini hüquq müdafiəçiləri kimi təqdim edən şəxslər
guya hüquqlarını qorumağa "and içdikləri" bir insanı çirkin, heç
bir əxlaq normalarına sığmayan şantaj aksiyasının iştirakçısına
çeviriblər. "Azadlıq" qəzetinin yaydığı məlumatlarda göstərilir ki,
guya Naxçıvan MR MTN-in əməkdaşı İbrahim Musayev adlı şəxs təqib
olunduğu üçün xarici ölkələrdən birinə qaçıb və MTN-in sifarişi
əsasında mərhum Turac Zeynalovun həyat yoldaşı Gülnar Ağayevaya
sui-qəsd hazırlanıb. Bildiririk ki, "Azadlıq" qəzeti vasitəsilə
özünü Naxçıvan MR MTN-in əməkdaşı kimi təqdim edən İbrahim Musayev
heç vaxt təhlükəsizlik orqanlarının əməkdaşı olmayıb, bu cür
mənəviyyatsız insanın ümumiyyətlə MTN ilə hər hansı bir formada
bağlılığı yoxdur.
"Azadlıq" qəzetində dərc edilmiş şər və böhtan xarakterli
məlumatların "qəhrəmanı" barəsində aparılmış araşdırmalar zamanı
müəyyən edilib ki, Musayev İbrahim Həsən oğlu 21 noyabr 1992-ci il
tarixdə Naxçıvan şəhərində anadan olub, Naxçıvan şəhəri Qoçüstü
məhəlləsi, bina 2, mənzil 45-də yaşayıb və orada qeydiyyatdadır.
Atası Musayev Həsən Kamil oğlu əslən Babək rayonunun Nehrəm
kəndindəndir, 15 il əvvəl ailəsini ataraq Rusiya Federasiyasının
Yaroslavl şəhərinə köçüb, Lena adlı qadınla ikinci dəfə ailə
quraraq orada yaşayır.
İ.Musayev əvvəllər Naxçıvan şəhərindəki Heydər Əliyev adına Hərbi
Liseydə təhsil alıb, əxlaqi-mənəvi keyfiyyətlərinin aşağı olması
səbəbindən lisey rəisinin 24 yanvar 2008-ci il tarixli 18 nömrəli
əmri ilə liseydən qovulub. Sonradan təhsilini orta məktəblərin
birində davam etdirən İ.Musayev 2010-cu ildə Naxçıvan Dövlət
Universitetinə daxil olub, universitetin İncəsənət fakültəsinin
Təsviri incəsənət müəllimliyi ixtisasının əyani şöbəsində 2-ci
kursadək təhsil alıb, davamiyyəti pozması və intizamsızlığı
səbəbindən 08 iyul 2012-ci il tarixdə 3/248 saylı əmrlə
universitetdən xaric edilib. Naxçıvan Dövlət Universitetinin 26
noyabr 2012-ci il tarixli məktubu əsasında Naxçıvan MR Səfərbərlik
və Hərbi Xidmətə Çağırış üzrə Dövlət Xidmətinin (SHXÇDX) Naxçıvan
şəhər İdarəsi universitetdən xaric edilmiş İ.Musayevin hərbi
xidmətə cəlb edilməsi üçün qeydiyyatda olduğu ünvana çağırış
göndərib. Lakin çağırışa cavab olaraq Musayev Fərhad Həsən oğlu
qardaşı İ.Musayevin ailədaxili münaqişələrə görə bir müddət
onlardan ayrı yaşadığını, sonradan isə Rusiya Federasiyasına
getdiyini bildirib. SHXÇDX-nin Naxçıvan şəhər İdarəsi 03 dekabr
2012-ci il tarixli 2/318 və 2/320 nömrəli məktubla İ.Musayevin
tapılaraq hərbi xidmətə cəlb edilməsi üçün Naxçıvan şəhər Polis
İdarəsi və Naxçıvan şəhər Prokurorluğuna müraciət olunub.
İ.Musayevi tanıyan şəxslər onu dələduz, şöhrətpərəst, mənəviyyatsız
bir şəxs kimi xarakterizə etmişlər. Həmçinin məlum olub ki,
İ.Musayev ətrafdakılara özünü dövlət orqanlarında yüksək vəzifədə
işləyən şəxs kimi də təqdim edib. Belə ki, İ.Musayev qohumu olan
xanımı aldadaraq onunla evlənəcəyinə vəd verib və həmin şəxsi
"qaçırıb". Lakin həmin şəxsin ailəsi məsələyə müdaxilə etdikdən
sonra İ.Musayevin digər bir qohumu ilə də nikahdankənar
münasibətlər saxladığı və nəticədə həmin qadının 2 aylıq hamilə
olduğu ortaya çıxıb. Bu səbəbdən "qaçırılan" xanım valideynlərinə
təhvil verilib və I.Musayev hamilə qadınla evlənməli olub. Onların
toyları 05 iyun 2012-ci il tarixdə Naxçıvan şəhərində yerləşən
"Xəyal" restoranında keçirilib, İ.Musayevin ləyaqətsiz
hərəkətlərinə görə ailəsi və qohumları həmin toyda iştirak
etməyiblər. Toy xərclərini ödəməyən İ.Musayev babası Həsənov
Səyavuş Savalan oğluna məxsus Naxçıvan şəhəri Qoçüstü məhəlləsi,
bina 2, mənzil 45-in sənədlərini oğurlayaraq restoranın müdiri
Qasımov Əfqan Əli oğluna (mobil tel: 070 600 00 84) verib, restoran
müdirini aldatmaqla özünün Azərbaycan MTN-də yüksək vəzifədə
işlədiyini bildirərək ona hədə-qorxu gəlib, 1500 manat məbləğində
toy xərcini ödəməkdən yayınıb (toyun videokasetləri pul
ödənilmədiyi üçün restoranda qalıb). O, həmçinin Naxçıvan şəhərində
fəaliyyət göstərən "Ləzzət-qida" MMC-nin əməkdaşı Həsənov Əli
Məhəmməd oğlunu (mobil tel: 051 945 56 97) da aldadaraq toyu üçün
586 manat 40 qəpik məbləğində ərzaq məhsulları götürüb, lakin
pulunu ödəməyib. Naxçıvan şəhərində fəaliyyət göstərən "Gənclik"
Ticarət Mərkəzindəki qadın gözəllik salonunda işləyən Həsənova
Fatma Həsən qızından (mobil tel: 050 633 14 88) 1200 manat
dəyərində gəlin paltarını 350 manata kirayə götürüb, lakin kirayə
haqqını ödəməyib, gəlin paltarını yararsız vəziyyətə saldığına görə
salon sahibi 1200 manat ziyana düşüb. İ.Musayev həmin paltarı
götürərkən pulunu ödəyəcəyi vədi ilə AB 591590 saylı sürücülük
vəsiqəsini salonda girov qoyub.
İ.Musayev Naxçıvan şəhərində yerləşən mobil telefon mağazası sahibi
Hüseynov Vüsal Mətləb oğlunu (mobil tel: 070 744 69 69) aldadaraq
ondan 380 manat dəyərində mobil telefon alıb, əvəzində isə AZE
06503214 saylı şəxsiyyət vəsiqəsini mağaza sahibinin etibarını
qazanmaq məqsədilə ona verib. İ.Musayev telefonun pulunu ödəməkdən
yayınıb, mağaza sahibi pulunu tələb etdiyi vaxtlarda isə özünü
Naxçıvan MR DİN-nin yüksək rütbəli əməkdaşı kimi təqdim edərək onu
hədələyib. İ.Musayev həmçinin Naxçıvan şəhərindəki "Cahan" Ticarət
mərkəzində meyvə ticarəti ilə məşğul olan Afiq Bayramovdan (mobil
tel: 051 512 39 75) da 100 manat məbləğində meyvə alaraq pulunu
ödəməyib.
Bundan başqa, İ.Musayev ləyaqətsiz hərəkətlərinə etiraz edən
babası, nənəsi və anasının birgə yaşadıqları mənzilə gələrək onları
təhqir etmiş, dava-dalaş salaraq mənzildəki əşyaları sındırıb. Bu
hadisə ilə bağlı İ.Musayevin babası Həsənov Səyavuş Savalan oğlu
polis orqanlarına şikayət ərizəsi ilə müraciət edib.
Müxalifət mətbuatında yeni bir Elşad Abdullayev obrazı yaratmağa
çalışan şəxslərin nəzərinə çatdırırıq ki, İ.Musayev məhz törətdiyi
əməllərə görə cinayət məsuliyyətinə cəlb olunacağından qorxduğu,
həmçinin hərbi xidmətə çağırışdan boyun qaçırmaq və borclarını
ödəməkdən yayınmaq üçün 02 sentyabr 2012-ci il tarixdə Heydər
Əliyev adına Bakı Beynəlxalq Hava Limanından Bakı-Moskva təyyarə
reysi ilə ölkəni tərk edərək Rusiya Federasiyasına gedib".
Naxçıvan MR MTN-in mətbuat xidməti mərhum Turac Zeynalovun həyat
yoldaşı Gülnar Ağayeva ilə bağlı İbrahim Musayevin dediklərinə də
aydınlıq gətirib: "Culfa rayon Ərəzin kənd sakini Ağayeva Gülnar
Yəhya qızı Naxçıvan MR MTN-ə ərizə ilə müraciət edərək bildirib ki,
mərhum həyat yoldaşı Turac Zeynalovun ölümü ilə əlaqədar Bakı
şəhərində olarkən telefonuna naməlum nömrədən zəng gəlib və özünü
qeyri-hökumət təşkilatının hüquqşünası kimi təqdim edən şəxs ona
hüquqlarının qorunmasında yaxından köməklik göstərmək istədiyini
bildirib. Həmin şəxs G.Ağayevanın etibarını qazanmaq və özünü
imkanlı bir şəxs kimi göstərmək məqsədilə "Dəmirbank"ın əməkdaşı
olduğunu da deyib. G.Ağayeva bu şəxsin sonradan əslində İbrahim
Musayev olduğunu öyrənib. İ.Musayev sonrakı müddətdə G.Ağayevaya
Naxçıvan MR-də fəaliyyət göstərən Demokratiyaya Dəstək və İnsan
Hüquqları Resurs Mərkəzinin sədri Məlahət Nəsibova ilə birgə
çalışdığını, sonuncunun xarici təşkilat və ölkələrdən külli
miqdarda qrantlar aldığını bildirib, adıçəkilən QHT rəhbərinə
köməklik etməklə MTN-i birgə şantaj edib çoxlu pul qazanmaq, xarici
səfirlik və nümayəndəliklərlə görüşlər keçirib gələcəkdə Avropa
ölkələrinin birində siyasi sığınacaq ala biləcəklərini vəd edib.
Lakin G.Ağayeva İ.Musayevin xoşniyyətli olmadığını anlayıb və ondan
uzaqlaşıb. Elə bu səbəbdən İ.Musayev "məslək yoldaşları və
havadarlarının" köməkliyi ilə Naxçıvan MR MTN və G.Ağayeva barədə
şantaj, böhtan xarakterli, həqiqətəuyğun olmayan məlumatlar yaymağa
başlayıb.
Həmçinin G.Ağayevanın bildirdiyinə görə, özünü "Azadlıq" qəzetinin
redaktoru kimi təqdim edən Yafəz Həsənov bir neçə dəfə onun mobil
nömrəsinə zəng edərək İbrahim Musayevin dediklərini təsdiqləməsi
üçün ona şirnikləndirici vədlər verib, onlarla əməkdaşlıq etməyə
razı salmağa çalışıb. Lakin Y.Həsənov G.Ağayeva tərəfindən rədd
cavabı aldıqdan sonra sonuncunun telefonuna boş SMS-lər göndərməklə
onu narahat etməyə başlayıb.
05 dekabr 2012-ci il tarixdə Məlahət Nəsibova "Azadlıq" qəzetinə
müsahibəsində bildirib ki, qızı ali məktəbə hazırlaşarkən repetitor
yanına gedib, guya bir müddət sonra müəllimlər təzyiqlər
nəticəsində onun qızı ilə məşğul olmaqdan imtina ediblər. Sonra isə
M.Nəsibova guya qızını özü hazırlaşdırdığından, yüksək balla ali
məktəbə qəbul olduğunu vurğulayıb. Onun bu iddiasına cavab olaraq
bildiririk ki, natamam orta təhsilli M.Nəsibovanın bu iddiaları
absurddur. Belə "yüksək savadı" olan M.Nəsibova, görəsən, indiyədək
nə üçün özü ali təhsil ala bilməyib?
Naxçıvanda fəaliyyət göstərən, heç bir ali təhsili olmayan,
üzdəniraq hüquq müdafiəçilərinin daim gündəmdə qalmaq, siyasi
dividentlər əldə etmək üçün ucuz şoular yaradaraq dövlət orqanları
barədə yalan və böhtan xarakterli məlumatlar yaymaları respublika
ictimaiyyətinə çoxdan bəllidir. İctimaiyyət nümayəndələri
tərəfindən onların yaramaz hərəkətləri daim qınaq obyekti olmuş, bu
gün də olmaqdadır. Ölkəmizdəki demokratiya və söz azadlığından
sui-istifadə etməyi özlərinə ar bilməyən belə ünsürlər maraqlı
qüvvələrin sifarişi ilə cəmiyyətdə dövlət orqanlarına qarşı nifrət
yaratmağa və vətəndaşların dövlətimizə olan etimadının
zəiflədilməsinə çalışırlar. Lakin şübhə yoxdur ki, xalq sabaha
inamla baxır və bu inamın reallaşması üçün ölkənin daxilində, eləcə
də xaricində olan heç bir qüvvənin öz məkrli niyyətini həyata
keçirməsinə imkan verilməyəcək".