BSU-da Konstantinos Kavafisin şeirlərindən ibarət kitab işıq üzü gördü
11 Dekabr 2012 18:35 (UTC+04:00)
Movqe.Az xəbər verir ki, YUNESKO Yunanıstanın tanınmış şairi
Konstantinos Kavafisin anadan olmasının 150-ci ildönümü
münasibətilə 2013-cü ili Kavafis ili elan edib.
Xatırladaq ki, Konstantinos Kavafis 29 aprel 1863-cü ildə Misirin
İskəndəriyyə şəhərində tacir ailəsində dünyaya göz açmışdır.
1904 və 1910-cu illərdə çap etdiyi "Şeirlər" kitabını geniş oxucu
kütləsinə təqdim etmiş və müasir yunan dilində yazan ən görkəmli
şairlərdən biri kimi tanınmışdır.
Konstantinos Kavafisin yubileyi ilə əlaqədar Bakı Slavyan
Universitetində fəaliyyət göstərən Müasir Yunan Dili və Mədəniyyəti
Mərkəzi tərəfindən şairin şeirləri Azərbaycan dilinə tərcümə
olunmuş və universitet tərəfindən çap edilmişdir.
11 dekabr tarixində BSU-da dahi yunan şairi Kavafisin seçilmiş
şeirlərindən ibarət kitabının təqdimat mərasimi keçirildi və
bununla YUNESKO tərəfindən K.Kavafislə bağlı dünyada keçiriləcək
silsilə tədbirlərə start verildi. Nəzərə çatdıraq ki, tədbir
Yunanıstan Respublikasının Azərbaycandakı səfirliyinin himayəsi ilə
həyata keçirilir.
Tədbirdə Yunanıstanın Azərbaycandakı Fövqəladə və Səlahiyyətli
səfiri cənab İoannis Metaksas, səfriliyin əməkdaşları, UNESCO-nun
AzərbaycanRespublikası üzrə Milli Komissiyasının birinci katibi
Günay Əfəndiyeva, Milli Məclisdə Azərbaycan-Yunanıstan Dostluq
Qrupunun üzvü İqbal Məmmədov və Bakıda yaşayan yunanlar iştirak
edirdilər.
Mərasimdə qonaqları salamlayan BSU-nun rektoru, AMEA-nın müxbir
üzvü professor Kamal Abdullayev bu tədbirin universitetdə
keçirilməsindən şad olduğunu bildirdi: "Kitabın nəşri Kavafis kimi
dahi yunan şairini Azərbaycan oxucusuna yaxınlaşdırmaq anlamında
qiymətlidir. Eyni zamanda, kitabın maraqlı tərtibatı onun gələcəkdə
təlim və tədris prosesində çox böyük rol oynayacağına inandırır.
Belə ki, bu kitab vasitəsilə təkcə yunan poeziyasının görkəmli
nümayəndəsi ilə tanış olmaq deyil, eyni zamanda Azərbaycan
dili vasitəsilə yunan dilini bir daha dərindən öyrənmək üçün
əhəmiyyətli olacaq". Rektor onu da qeyd etdi ki, bu toplunun nəşri
ilə UNESCO tərəfindən elan edilən dünyaca məşhur yunan şairinin
150-illik yubileyinə həsr olunmuş 2013-cü ilə – Konstantinos
Kavafis ilinə aid silsilə tədbirlər başlayır, bu da bizdə xüsusi
şərəf və qürur hissi oyadır. Bu bizim tərəfimizdən böyük filosof və
lirik şairin xatirəsinə ən böyük etiramın əlamətidir. Sonda
professor K.Abdullayev Yunanıstanın Azərbaycandakı səfirinə cənab
İoannis Metaksasa hazırki toplunun nəşri üçün göstərdiyi səylərinə
görə minnətdarlığını bildirdi. Həmçinin, BSU tələbələrinin elm,
təhsil, mədəni-maarif həyatında fəal iştirak etdiklərinə görə
səfirliyin bütün əməkdaşlarına, kitabın nəşrində yaxından iştirak
etmiş universitet tələbələri və əməkdaşlarına təşəkkür etdi: "Ümid
edirəm ki, biz ikitərəfli əlaqələrimizi, xüsusilə ədəbi
əlaqələrimizin möhkəmlənməsi naminə yaradıcı əməkdaşlığımızı davam
etdirəcəyik".
Yunanıstanın Azərbaycandakı səfiri cənab İoannis Metaksas öz
çıxışında kitabın ərsəyə gəlməsində iştirak edən hər kəsin əməyini
təqdirəlayiq hesab etdi: "Qürur hissi keçiririk ki, Müasir
Ellinizmdə Kavafis kimi şair yetişib, bu isə öz növbəsində
yunanların ümumbəşəri mədəniyyətə öz töhvələrini verməkdə davam
etdirdiklərinə sübutdur. Kavafis adi şair deyil. O, bütün fəlsəfi
fikirlərini bu gün danışılan yunan dilinə daha yaxın bir dildə
ifadə edən dahi filosofdur". Səfir BSU-nun rektorunu bu kitabın
nəşri ilə təbrik etdi və onun ərsəyə gəlməsində bütün əməyi
keçənlərə dərin təşəkkürünü bildirdi.
UNESCO-nun Azərbaycan Respublikası üzrə Milli Komissiyasının
birinci katibi Günay Əfəndiyeva, Azərbaycan-Yunanıstan Dostluq
Qrupunun üzvü İqbal Məmmədov çıxış edərək tədbirin əhəmiyyətini bir
daha vurğuladılar. Bildirdilər ki, bu cür nəşrlər iki ölkə arasında
mədəni əlaqələrin inkişaf etməsinə öz töhvəsini verəcəkdir.
Sonda Kavafisin şeirləri səsləndiridi və onun həyat və
yaradıcılığına həsr olunmuş film nümayiş olundu.