“TQDK dərsliklərin monitorinqi zamanı Təhsil Nazirliyindən narazı olan adamlardan daha çox istifadə edir”
14 Dekabr 2012 16:02 (UTC+04:00)
"Tələbə Qəbulu üzrə Dövlət Komissiyası dərsliklərin monitorinqi
zamanı Təhsil Nazirliyindən narazı olan adamlardan daha çox
istifadə edir. Bu adamlar isə dərslikləri keçməyən nəşriyyatlar və
onların müəllifləridir".
Bunu APA-ya açıqlamasında Təhsil Nazirliyinin dərslik və nəşriyyat
şöbəsinin müdiri Faiq Şahbazlı TQDK tərəfindən həyata keçirilən
dərsliklərin monitorinqinə münasibət bildirərkən deyib.
Monitorinqlərin bəzilərində şəxsən özünün və şöbə əməkdaşlarının
iştirak etdiyini deyən F.Şahbazlı əlavə edib ki, ibtidai sinif
dərsliklərinin monitorinqi hələ ki, bu prosesin ilkin mərhələsidir.
Onun sözlərinə görə, monitorinqlər zamanı müəllimlərin sözləri
dinlənilir, müxtəlif fikirləri eşidilir və fərqli münasibətlər
bildirilir: "Bu prosesə ümumtəhsil məktəblərinin müəllimləri,
maraqlı insanları, daha çox dərslikləri keçməyən insanları
toplayırlar. Onlar da monitorinqlər zamanı müəyyən fəaliyyət
göstərir və əksinə münasibət bildirirlər. Bizdə çalışırıq ki,
Təhsil Nazirliyi olaraq onlara müəyyən cavab verək. Hər halda bütün
bu işlərin nəticələri bir daha mütəxəssislərin və müəlliflərin
iştirakı ilə yüksək səviyyədə müzakirə olunacaq."
Şöbə müdiri onu da deyib ki, bu vaxta kimi aparılan
monitorinqlərinin prosedur qaydalarından narazı deyil.