“21 dekabr”da nələr olacaq?
17 Dekabr 2012 13:06 (UTC+04:00)
Son vaxtlar dünyada əsas müzakirə mövzusuna çevrilən dekabrın 21-i
dünyanın dağılması ilə bağlı iddia və şayələrin kökü əslində
2008-ci ildən başlayan iqtisadi böhrandadır. NASA kimi dünyanın ən
nüfuzlu kosmik agentliyinin alimlərinin, eləcə də müxtəlif dinlərin
alimlərinin verdiyi bəyanatları nəzərə alaq. Onlar həmin tarixdə
dünyanı təhlükədən kənar olduğunu bildirirlər. Deməli bu
söyləntilərin tamamilə başqa səbəblərinin olduğunu düşünməyə əsas
var.
Bir sıra mütəxəssislər ehtimal edirlər ki, bütün bunlar iri maliyyə
konsernlərini idarə edən təşkilat və qrupların marağındadır.
Dünyanı bürüyən iqtisadi böhrandan xilas olmağın yollarını axtaran
iri konsernlər müxtəlif üsullara əl atır. Xatırlayaq ki, 2008-ildə
iqtisadi böhrandan insanların bir çoxunun bank və maliyyə
sektoruna, alış verişə marağı azalmışdı. Vətəndaşlar pulu artıq
özlərindən başqa heç kəsə etibar etmirdilər. Və təsadüfi deyil ki,
məhz dünyanın sonu barəsində şayələr yayılandan sonra insanlar
əllərində olan maliyyə vəsaitlərini könüllü olaraq xərcləməyə
başladılar. Süleymana qalmayan dünya, bizə də qalmaz prinsipi
ilə.
İqtisadi böhranın tüğyan etdiyi ilk vaxtlardan başlayaraq bir çox
şirkətlər, maliyyə konsernləri, eləcə də banklar iflasa uğradı. Bu
amil təbii ki, birbaşa və ya dolayısı ilə sadə insanlara da təsir
etdi, onların da gəlirlərində azalmalar oldu. Bütün bunlar nəticə
etibarilə insanları qənaət etməyə, səyahətlərinin sayını xeyli
azaltmağa sövq etdi. Artıq insanlar banklara da etibar etmir,
əllərində olan vəsaiti ən yaxşı halda daşınmaz əmlakda saxlayırdı.
Dünya iqtisadiyyatının 70%-dən çoxunu əllərində saxlayan nəhəng
iqtisadi qruplar isə iqitasdi böhrandan qurtulmağın ən yaxşı
üsulunu insanlara psixoloji təsirdə gördülər. Və məhz həmin vaxt
ortaya 4 ildən sonra dünyanın dağılacağı ilə bağlı iddialar atıldı.
Etiraf edək ki, indinin özündə də bu iddialara 5 nəfərdən ikisi
inanmırsa, digər 3 nəfər inanır.
Kütləvi İnformasiya Vasitələrinə açıqlama verən geofizik
Vaqif Behbudoğlu maraqlı şərh verib: "Dini mənbələrdə Adəmlə
Həvvanın Yerə enməsi də həmin tarixlə eyni vaxtdadır. Bu 13 min il
öncə olub. Amma ümumilikdə, Yer üzündə antropogen amilin yaranması
2,5 milyon ildir. Katakilizm prosesində insanların şüuru silinir.
Ona görə də dini mənbələrdə belə qəbul edilib ki, insanın
başlanğıcı Adəmlədir və Adəmlə Həvvanın Yer üzünə enişi 13 min il
əvvəl olub."
Dindarlar da bu məsələyə birmənalı münasibət bəsləyir. Onlar hesab
edir ki, İslamda qiyamətin dəqiq tarixinin öncədən bilinməsi ilə
bağlı heç bir fikirlər yoxdur. Hətta quranda da bununla bağlı bir
neçə müddəa var. "Ağıllı" mayalar dəqiq tarix verirlər. 21 dekabr
2012 – ci il, saat 12.11 də. Allah isə bu tarixi kimsəyə
bildirmədiyini, bunu sadəcə özünün bildiyini söyləyir: "(Ey
Peyğəmbər!) Səndən qiyamətin nə zaman qopacağını soruşurlar. Sən
onu bilə bilməzsən. Onun nə zaman olacağını sadəcə Rəbbin bilir.
Sən sadəcə onun əzəmətindən qorxanlara (bunu) xatırladansan.
(Nazirat, 42-46)"
Göründüyü kimi bu şəkildə artıq dünyada turizmində yeni baxış və
canlanma yaranıb. Bir neçə şəhər toxunulmaz elan olunub və dünya
dağılarsa, orada olanlar sağ qalacaq kimi sözlərlə insanları cəlb
edirlər. 100 minlərlə insanlar bu yerlərə getmək üçün pul
xərcləyirlər. Mütəxəssislər insanları sadəlövh olmamağa və dünyada
baş verən prosesləri daha diqqətlə izləməyə dəvət edirlər. Yalnız
həmin vaxt onlar böyük bir yalanın parçasına çevrilməzlər.