Yağışın palçığa boyadığı yollar
19 Dekabr 2012 10:15 (UTC+04:00)
Bir neçə gündür fasilələrlə yağan yağış Bakının bir sıra ərazilərdə
asfalt yollarının çirkaba, palçığa bulaşmasına səbəb olub. Məsələ
burasındadır ki, yağış suları yolları yuyub təmizləmək əvəzində
ətrafdakı zir-zibili, toz-torpağı palçıq halına salıb asfalt
yollara yayır. Avtomobillərin təkərləri altından ətrafı sıçrayan
çirkab sular, palçıq kənardakı insanların üst-başlarını abırdan
salır. Niyə küçələrimiz palçıqlıdır?
Bu sualla müraciət etdiyimiz ekspertlər bildirirlər ki, son illər
Bakının palçıqlı şəhər olması barədə cəmiyyətdə fikir
formalaşıb.
Aparılan tikinti və qazıntı işləri zamanı yaranan toz-torpaq
təmizlənmədiyindən yağış yağanda şəhər palçıqlı olur. Yayda tozdan,
qışda isə palçıqdan əziyyət çəkən Bakı sakinləri bir sıra hallarda
çantalarında, ciblərində ayaqqabılarını, üst-başlarını təmizləmək
üçün əski, "şotka" daşımalı olurlar.
Yaşıllar Partiyasının sədri, ekoloq Mais Güləliyevin sözlərinə
görə, Bakı küçələrinin, yolların palçıqlı olmasının əsas
səbəbi yolların yuyulmamasıdır: "Yollar yuyulmur. Hər gün yuyulub
təmizlənsə, yağış yağanda palçıq olmaz. Həmçinin, Bakıya
yağıntı az düşür. Elə şəhərlər var ki, ora hər həftə yağış yağır və
yollardakı çirkbalar, palçıqlar yuyulur. Bizdə Bakı şəhərində ildə
bir neçə dəfə yağış yağır ki, bu qeyd etdiyiniz problemlərin üzə
çıxmasına səbəb olur".
Ekspert həmçinin bildirdi ki, yolların tez-tez qazılması, asfalt
örtüyünün dağılması yolların bərbad hala düşməsinə gətirib çıxarır:
"Sovet dövründə Bakı şəhəri hər gün səhər tezdən yuyulardı. Yağış
yağanda yolda palçıq yaranmazdı. Amma indi tamam başqa
stiuasiyadır. Nəqliyyat Nazirliyinin tabeliyində olan bəzi yollar
yuyulur. Lakin bunu bütün yollar barəəd demək olmaz. Əgər yağış
yağanda körpülərdən lil axırsa deməli, bu, tozdan yaranıb.
Səkilərin kənarındakı qalın palçıq isə qazıntı zamanı asfaltın
üstünə atılmış və sonradan təmizlənməmiş torpaqdır. Ona görə də
xoşagəlməz vəziyyət yaranır".
Müstəqil Nəqliyyatçılar Məsləhət və İnformasiya İctimai Birliyinin
sədri Natiq Ələkbərli isə qeyd etdi ki, küçələrin vaxtı-vaxtında
süpürüldməməsi və yuyulmaması yağışlı günlərdə palçığın yaranmasına
səbəb olur: "Vaxtında təmizlik işləri aparılsa, yollarda qazıntı
işləri aparılarkən təmizliyə riayət olunsa, problem yaranmaz. Yağış
yağandan sonra avtoyuma məntəqələrinin qarşısında növbə olur. Küçə
uşaqları əllərində süngər (maçalka) dururlar yollarda. Yağış
yağanda avtomobillər yuyulmaq əvəzinə, kir-pasın içində olur.
Palçıq maşınları görünməz hala salır".
Ekspert bildirir ki, şəhərin palçıqlı olmasına digər səbəb zibil
qutularının vaxtı-vaxtında boşaldılmamasıdır: "Aşıb-daşan zibil
qutuları ətrafı çirkləndirir. Avtomobillərin təkərləri altında
ətrafa səpələnən zibillər sonradan palçıqla qarışıb əcaib mənzərə
yaradır. Bundan başqa, yarımçıq qalmış binalardan küləyin ətrafa
səpələdiyi toz-torpaq da sonradan palçıqa çevrilir. Yolların
təmizliyini həyata keçirən qurumlar həqiqətən də təmizlik yaratmaq
istəyirlərsə, ilk növbədə səbəbləri öyrənməli, sonra nəticələri
aradan qaldırmağa başlamalıdılar".