"Səkkizlik" İctimai Palatanı sıradan çıxarır
19 Dekabr 2012 11:42 (UTC+04:00)
Kamil Seyidov: "Bundan sonra müxalifətin güc
mərkəzinin "səkkizliyə" cəmlənə biləcəyini düşünmək
olar"
Artıq açıq şəkildə görünür ki, müxalifət düşərgəsində yeni birlik
formalaşmaqdadır. İctimai Palatanın alternativi kimi
dəyərləndirilən yeni birliyin birincini sıradan çıxarması da
bəziləri tərəfindən qaçılmaz sayılır. Söhbət artıq "səkkizlik" adı
alan qüvvələrdən gedir. Məlumatlara görə "səkkizlər"in yaxın
günlərdə daha bir görüşü reallaşa bilər.
Növbəti belə bir tədbir AMİP sədri Yusif Bağırzadə tərəfindən
təşkil olunmalıdır. Hətta məlum olub ki, AXCP sədri bu görüşə də
dəvət ediləcəyi təqdirdə qatılacaq. Belə bir açıqlama ilə AXCP Ali
Məclisinin sədri Həsən Kərimov çıxış edib. O, İctimai Palatada
olmayan partiyalarla funksional əməkdaşlıq etdiklərini söyləyib.
Ona görə də onların dəvətlərindən imtina etməyəcəklərini də diqqətə
çatdırıb. Belə bir açıqlama isə o anlama gəlir ki, AXCP artıq sözün
həqiqi mənasında İctimai Palata ilə əlaqələri kəsməyə doğru
istiqamət götürüb. Bu halda isə İctimai Palatanın dağılması
qaçılmaz olacaq. Deməli artıq Əli Kərimlinin Müsavat başqanını
ofsayd vəzyyətinə qoymaq planı da gerçəkəlşir. Belədə artıq
cəmiyyətdə İsa Qəmbərin təkləndiyi fikri formalaşacaq.
"Səkkizlər"in ikinci görüşünə də Əli Kərimlinin qatılmaq niyyəti
bir daha göstərir ki, İctimai Palatadakı iki qrup arasında
münasibətlər hələlik üzdə görünməsə də artıq gərginləşib. Belə bir
durumda İctimai Palatanın parçalanmaqdan başqa digər çıxış yolu
qalmır. Əvəzində isə yuxarıda da qeyd etdiyimiz kimi, müxalifətin
güc mərkəzi "səkkizlik" ətrafında toplanır.
Məsələ ilə bağlı münasibətini öyrəndiyimiz AMİP funksioneri Əli
Orucov da vurğuladı ki, İctimai Palatadakı namizəd məsələsində
fikir ayrılığı tədricən müxalifətin güc mərkəzinin "səkkizlik"
ətrafında toparlanmasına stimul verə bilər: "Müxalifətin vahid
namizəd məsələsində razılığa gələ bilməməsi təəssüf doğurur. Bu isə
artıq İctimai Palatanın özünün mövcudluğuna ciddi təhlükənin
yaranması deməkdir. İstərdim ki, İctimai Palata və ondan kənarda
olan müxalifət dairələri bir yerə yığılıb vahid namizədlik
məsələsində ən azından fikir mübadiləsi aparsınlar. Onların mütləq
mənada razılığa gəlmələri şərt deyil. Hər halda ilkin fikir
mübadiləsinin və rəylərin dinlənilməsi işin xeyrinə olardı. İctimai
Palata və Məşvərət Məclisində hər bir partiya fərdi qaydada təmsil
olunur. Hər iki qurumda təmsil olunan təşkilatlar siyasi
kurslarında müstəqildirlər. Onlar üzərlərinə hər hansı bir öhdəlik
götürməyiblər. Ona görə də görünür, İctimai Palatadakı fikir
ayrılıqları müxalifətin yeni güc mərkəzinin yaranması üçün müəyyən
addımların atılmasına, görüş və təmaslar barədə razılıq əldə
olunmasına imkan yaradır. İstəməzdim ki, Müsavat Partiyası bu
müzakirələrdən kənarda qalsın. Amma hər bir partiya müstəqil kurs
yeritməkdə sərbəstdir. Bu yöndə onlara hər hansı bir irad tutmaq da
yersizdir. İctimai Palatada vahid namizəd məsələsində razılıq
olmasa, orada təmsil olunan Müsavat Partiyası ilə AXCP seçkilərə
fərdi qaydada, ayrı-ayrılıqda qatılacaqsa, İsa Qəmbər öz ətrafında
yeni bir güc mərkəzinin yaradılmasına çalışacaq. Əli Kərimli də
həmçinin çalışacaq ki, iddialı namizəd kimi özünün favorit olduğu
bir güc mərkəzində təmsil olunsun. Bu isə o demək olacaq ki, artıq
İctimai Palata öz fəaliyyətini sona çatdırır. Vahid namizəd
məsələsində təəssüf ki, hər bir müxalifət partiyası öz namizədinin
üzərində israr edir. Bu isə heç də yaxşı sonuclar gətirmir. Lakin
nə etmək olar ki, vəziyyət belədir".
ADP sədri Sərdar Cəlaloğlu isə sözügedən məsələ barədə indidən
nəticə çıxarmağın hələ tez olduğunu düşünür: "Hələlik "səkkizlər"in
fəaliyyətində irəliyə doğru yeni bir təşəbbüs və gəlişmələr yoxdur.
Bu səbəbdən də indilikdə düşünürəm ki, "səkkizlərin" müxalifətin
güc mərkəzinə çevrildiyi barədə nəticə çıxarmaq hələ tezdir. Amma
bütün hallarda situasiyanın məhz bu istiqamətdə getməsini
arzulayırıq".
Azad Respublikaçılar Partiyasının sədri Kamil Seyidov da bu
qənaətdədir ki, bir müddətdən sonra müxalifətin əsas güc mərkəzi
"səkkizlik" adlanan qurumda cəmlənə bilər: "Artıq gün kimi aydındır
ki, İctimai Palatada Əli Kərimli ilə İsa Qəmbər arasında vahid
namizədlik məsələsində ortaq məxrəc əldə olunmayacaq. Hər iki lider
ambissiyalarını önə çəkdiyindən bir-birinə güzəştə getmək fikrindən
çox uzaqdırlar. Belədə bir müddət əvvəl "Asiman" restoranında baş
verən tədbir müxalifətin yeni güc mərkəzinin yarana biləcəyindən
xəbər verir. Hansı ki, İP-də təmsil olunan AXCP sədrinin də həmin
toplantıya qatılması sözügedən qurumun yaxın zamanlarda
parçalanacağına bir işarədir. Bəllidir ki, İP-də güc mərkəzi
Müsavatla AXCP ətrafında toplaşıb. AXCP-nin "səkkizlər"lə təmas
qurması isə İP-də yaxın dönəmdə yalnız Müsavatın qalacağından xəbər
verir. Bu isə istər-istəməz İP-in bir qədər də zəifləyəcəyi
anlamına gəlir. AXCP isə görünür, bundan sonrakı fəaliyyətini
"səkkizlik" daxilində davam etdirəcək. Belə vəziyyət isə İP-nin
zəifləməsinə, əvəzində "səkkizlik" adlanan qrupun güclənməsinə
gətirib çıxarmalıdır. Bu halda da bundan sonra müxalifətin güc
mərkəzinin "səkkizliyə" cəmlənə biləcəyini düşünmək olar. Amma
bütün hallarda müxalifətin hazırkı gücü iqtidar üzərində qələbə
çalmaqdan qat-qat aşağı səviyyədədir. Onlar hətta vahid blokda
birləşsələr belə, uğurlu siyasət aparan hazırkı iqtidar qarşısında
acizdirlər".