Reproduktiv sağlamlıqla bağlı qanunun gələn il qəbulu gözlənir
19 Dekabr 2012 15:19 (UTC+04:00)
Azərbaycanda övladı olmayanların sayının artdığı bir məqamda Milli
Məclisin Sosial siyasət komitəsinin sədri Hadı Rəcəblinin mediada
səslənən fikirləri xüsusi diqqət cəlb etdi. Həmin açıqlamadan belə
məlum olurdu ki,
"Ailə planlaşdırması və reproduktiv sağlamlıq haqqında" qanun
layihəsinin parlamentdəki müzakirəsi dayandırılıb. Belə fikirlər də
səslənirdi ki, Hadı Rəcəbli burada dinlə uyğunsuzluq olduğuna görə
bütövlükdə məsələnin gündəmdən çıxarıldığını bildirib.
Lakin Milli Məclisin Sosial siyasət komitəsinin sədr müavini Musa
Quliyev mediada yayılan məlumatın yanlış olduğunu bildirir və "Ailə
planlaşdırması və reproduktiv sağlamlıq haqqında" qanun layihəsinin
sadəcə payız sessiyasının gündəliyindən çıxarıldığını qeyd edir.
Mövqe. Az saytına açıqlamasında bu xüsusda o, aşağıdakı fikirləri
səsləndirib: "Bu məsələ sadəcə payız sessiyasında gündəlikdən
çıxarılıb. Çünki, payız sessiyasında cəmi iki iclas qalıb. "Ailə
planlaşdırması və reproduktiv sağlamlıq haqqında" qanun layihəsi
yaz sessiyasının gündəliyinə salınacaq və müzakirə ediləcək. Payız
sessiyasında qanun layihəsinin gündəlikdən niyə çıxarılmasına
gəlincə, bu maliyyə məsələsi iəl bağlı olub. Maliyyə ilə bağlı
müddəalarda Maliyyə Nazirliyi ilə razılaşmamağımıza görə, "Ailə
planlaşdırması və reproduktiv sağlamlıq haqqında" qanun layihəsini
saxladıq. Gələnilki yaz sessiyasında maliyyə ilə bağlı məsələyə də
aydınlıq gətriləcək. Yaz sessiyasında isə "Ailə planlaşdırması və
reproduktiv sağlamlıq haqqında" qanun layihəsi mütləq qəbul
olunacaq. Bu, gündəlikdən çıxarılası qanun deyil".
Musa Quliyev ölkə daxilində süni mayalanmanın həyata keçirilməsini
də vacibb sayır: "Süni mayalanma ölkə daxilində həyata keçirilir və
keçiriləcək də. Ekstrokarparal mayalanmadan söhbət gedir. Bəli,
bunlar həyata keçiriləcək. Sadəcə mübahisəli məqamlardan biri də
budur ki, süni mayalanma yalnız dövlət müəssisəsində olsun, yoxsa
özəl müəssisələr də burada iştirak etsin. Bu məsələni müzakirə
edəcəyik. Yəqin ki, yaz sessiyasında məsələyə baxılacaq və tam
aydınlıq gətiriləcək. İstisna edilmir ki, yaz sessiyasında "Ailə
planlaşdırması və reproduktiv sağlamlıq haqqında" qanun layihəsi
qəbul ediləcək".