Azərbaycanda fermerlərə verilən subsidiyalarda dəyişiklik ediləcək. Bunu jurnalistlərə kənd təsərrüfatı naziri İsmət Abasov bildirib. Onun sözlərinə görə, fermerlərə verilən subsidiyaların əsasən nağd pulla yox, müxtəlif gübrələr və dərman preparatlarla verilməsi təklif olunub. 2009-cu ildə Azərbaycan tarixində ilk dəfə olaraq ölkədə 3 milyon ton buğda və buğda məhsulları istehsal olunub. Təəssüflər olsun ki, sonrakı illərdə təbiətin şıltaqlığı nəticəsində istehsalın səviyyəsi aşağı düşüb. Nazir deyib: "Fermerlərə verilən subsidiyalar düzgün istifadə olunmur. Bizim tələbatımızın cəmi 10% üçün gübrə istifadə olunur. Bu da taxıl məhsullarının aşağı düşməsi ilə nəticələnir. Azərbaycanda taxılın orta məsul səviyyəsi hər hektara 25 sentner düşürsə, biz ilkin mərhələdə bunu 35 sentnerə çatdıra bilərik. Əgər verilən subsidiyalar nağd pulla deyil, gübrə məhsulları ilə verilsə, ölkədə taxıl istehsalı arta bilər. 2012-ci ildə Azərbaycanda 2,7 milyon ton taxıl məhsulu proqnozlaşdırılsa, biz bunu 3,6 milyon tona çatdıra bilərik. Bunun üçün də fermerlərə subsidiyaların verilməsində dəyişikliklər olacaq. Hazırda məsələyə Maliyyə Nazirliyində və Nazirlər Kabinetində baxılır".