Dövlət uşaq müəssisələrində təlim-tərbiyə alan uşaqların sayı azalır
21 Dekabr 2012 08:49 (UTC+04:00)
Hər il Təhsil Nazirliyi müəssisələrdə kimsəsiz məzunların
yerləşdirilməsi ilə bağlı problemlərlə üzləşir. Bu barədə
Azərbaycanda Dövlət Uşaq Müəssisələrində uşaqların ailələrə
verilməsi və alternativ qayğı Dövlət Proqramı çərçivəsində 2012-ci
ilin yekunları və qarşıda duran vəzifələrə həsr olunan hesabat
konfransında təhsil naziri Misir Mərdanov bildirib.
Onun sözlərinə görə, məzun olduqdan sonra bu müəssisələrdəki
uşaqlar həmin yerdə yaşamağa məcbur olurlar. Bu istiqamətdə Təhsil
Nazirliyi Prezident Administrasiyası və Nazirlər Kabinetinə
təkliflər göndərib.
Nazir deyib ki, 2011-2012 təhsil ilində uşaq evlərində 715 məzun
olub. Onlardan 489 nəfəri 9-cu sinif, 226 nəfəri isə 11-ci sinif
məzunudur. 11-ci sinif məzunlarından 51 nəfəri ali təhsil
müəssisələrinə qəbul olunub.
Misir Mərdanov bildirib ki, Təhsil Nazirliyi tərəfindən aparılan
məqsədyönlü tədbirlər nəticəsində dövlət uşaq müəssisələrində
təlim-tərbiyə alan uşaqların sayı azalır. O deyib ki, 2006-cı ildə
21 min, 2007-ci ildə 18 min 400, 2008-ci ildə 14 min 389, 2009-cu
ildə 10 min 55, 2010-ci ildə 9 min 827, 2011-ci ildə 9 min 776,
2012-ci ildə isə 8 min 336 nəfər olub. Dövlət uşaq müəssisələrində
gecələyən uşaqların sayında da ildən ilə azalma müşahidə edilir.
2008-ci ildə 4055, 2012-ci ildə isə 3671 nəfərə qədər azalma baş
verib.
Misir Mərdanov ali təhsil müəssisələrinin əlavə dəyər vergisindən
azad olunması ilə bağlı Milli Məclisdə müzakirə olunan məsələyə
münasibət bildirərkən deyib ki, ali təhsil müəssisələrinin əlavə
dəyər vergisindən azad olunması onların imkanlarını daha da
artırar.
O vurğulayıb ki, bu olsa, yaxşı olar: "Mən də arzu edirəm ki, belə
bir qanun qəbul edilsin. Universitetlərin əlavə dəyər vergisindən
azad olunması onların imkanlarını daha da artırar. Bu yeniliyin
özəl universitetlərə şamil olub-olunmayacağını isə qanunu
hazırlayanlar biləcəklər".
Misir Mərdanov deyib ki, Təhsil Nazirliyi tərəfindən Azərbaycanda
dövlət uşaq müəssisələrindən olan uşaqların ailələrə verilməsi ilə
bağlı həm qanunvericilikdə, həm də dövlət proqramlarında bir sıra
dəyişiklərin edilməsi ilə bağlı təkliflər hazırlanıb.
O bildirib ki, YUNİCEF-in dəstəyi ilə Milli Məclisdə İnklüziv
təlimlə bağlı hazırlanan yeni qanun layihəsi yaxın zamanlarda
müzakirə olunacaq. Nazirin sözlərinə görə, hökümətə isə kiçik qrup
ailələrlə bağlı əsasnamələrin təsdiq edilməsi və digər məsələlərlə
bağlı təkliflər təqdim edilib.
Onun sözlərinə görə, müəyyən məsələləri isə pilot layihə olaraq il
ərzində həyata keçirilib. Artıq pilotların vaxtı bitdiyindən
beynəlxalq təşkilatların da bizə ayırdığı dəstəyinin vaxtı bitib:
"Hazırda Azərbaycanda dövlət uşaq müəssisələrindən olan uşaqların
ailələrə verilməsi ilə bağlı işlərdə dünyada gedən proseslər
izlənilir. Əgər Təhsil Nazirliyinin həm Milli Məclis, həm də
hökumətə təqdim etdiyi bu təkliflər qısa zamanda nəzərə alınarsa,
gələn il uşaqların ailələrə verilməsi istiqamətində uğurlarımız
daha çox olacaq. Düşünürəm ki, ilin sonuna qədər bu qanun qəbul
olunar və yeni ildən bu məsələni daha geniş şəkildə müzakirə edə
bilərik".