Order üzünə həsrət bina sakinləri
21 Dekabr 2012 10:16 (UTC+04:00)
Bakı şəhərində istifadəyə verilən bir sıra yeni çoxmərtəbəli
binalardan mənzil alan vətəndaşların əksəriyyəti order üzünə
həsrətdilər. Mənzil sahibləri bildirirlər ki, mənzil alarkən
binanı inşa edən tikinti şirkətinin rəhbərliyi "bütün sənədlər
qaydasındadır" kimi yalan sözlərlə onları əmin ediblər.
Elə ki, bina tikilib qurtarıb və mənzillər sahiblərinə paylanılıb
ən vacib olan sənəd - qeydiyyat orderi vətəndaşlara verilməyib.
Məlum olub ki, bina Dövlət Qəbul Komissiyası (DQK) tərəfindən
istismara təhvil götürülməyib. Qeyd edək ki, order
verilmədiyindən vətəndaşlar mənzilin yerləşdiyi rayon üzrə
qeydiyyata düşə bilmirlər. Qeyd edək ki, problemin kökü
mənzil tikinti koorporativləri (MTK) ilə DQK arasında razılıq əldə
olunmaması ilə bağlıdır.
DQK binanın istsmara yararlı olması barədə rəy verdikdən sonra,
mənzillərdə yaşamaq mümkündür. Binalar istismara təhvil
verilmədiyinə və texniki şərtləri olmadığına görə, onlara təbii qaz
çəkilmir.
Müvafiq rəsmi qurumlar bildirir ki, yeni tikililərdə
bütün texniki şərtlərə əməl olunmalı və bina təhvil verilməlidir.
Yalnız bundan sonra binaya qaz və digər kommunal xidmətlər
göstərilə bilər. Ekspertlər hesab edirlər ki, vətəndaşların
order olmadan mənzildə yaşamaları qanunsuzdur.
Milli Məclisin regional məsələlər komitəsinin üzvü, millət vəkili
Qalib Salahzadənin sözlərinə görə, vətəndaşlara orderin verilməməsi
binanı inşa edən tikinti şirkətinin günahıdır: "Dövlət Qəbul
Komissiyası yaradılanda artıq bəzi binalar tikilib qurtarmışdı.
Həmin binalarda mənzillər satılıb qurtarıb. Binanın hüquqi sahibi
isə binanı qeydiyyatdan keçirməkdə maraqlı deyil. Əvvəla binanın
keyfiyyətilə bağlı komissiya əvvəlcə rəy, sonra onun istsmara
verilməsinə razılıq verilməlidir. Hələ bilmək olmaz, həmin binalar
komissiyadan uğurla keçə biləcək ya yox. Bütün hallarda mənzillərə
order verilməməsinə görə, məsuliyyəti tikinti şirkətlərinin
rəhbərləri daşıyır".
Mİllət vəkilinə görə, qeydiyyat məsələsini sürətləndirmək,
birdəfəlik həll etmək lazımdır. Qeydiyyatları olmadığı üçün
mənzildə yaşayanlar banklardan kredit götürə, sosial durumlarını
yaxşılaşdıra bilmirlər.
Daşınmaz əmlak bazarı üzrə ekspert Nüsrət İbrahimlinin sözlərinə
görə, MTK-lar vətəndaşlarla bağladıqları müqavilədə mənzillərin
orderlərinin alınmasını vətəndaşların öz üzərlərinə qoyur:
"Müqavilədə göstərir ki, orderi vətəndaş özü almalıdır. Bunun üçün
2 saylı forma və mənzildə yaşayanların razılığı ilə Texniki
İnventarlaşdırma Bürosuna müraciət etmək lazım gəlir. 15-25
manat arasında dövlət rüsumu ödənildikdən sonra mənzilə kupça -
qeydiyyat nişanı verilir. Amma bizdə orderin alınması prosesi
o qədər mürəkkəbdir ki, vətəndaş bu işə baş qoşmaq belə
istəmir. Qanunda nəzərdə tutulub ki, binanın sahibi hüquqi
şəxsdirsə order Dövlət Reyester Xidməti, dövlət və bələdiyyəyə
aiddirsə, rayon icra hakimiyyəti tərəfindən verilir.
Binalar DQK-ı tərəfindən istismara təhvil götürülmədiyi üçün
aidiyyəti dövlət qurumları mənzil sahiblərinə order vermirlər. Düz
edirlər. Bəlkə bina keyfiyyətsizdir, komissiya onu yaşamaq üçün
təhlükəli hesab edəcək. O, zaman orderi verən dövlət qurumundan
soruşacaqlar ki, yaşamaq üçün təhlükəli olan mənzilə niyə order
vermisən?". N.İbrahimli onu da bildirdi ki, vətəndaşlar mənzil
alarkən ehtiyatlı olmalıdılar: "DQK-sı tərəfindən istismara təhvil
götürülməyən binalardan mənzil almaqdan çəkinmək lazımdır. Order
ala bilməyəcəksən. Ordersiz mənzili isə heç kəsə satmaq, banka
girov qoymaq olmur".