Ölkəmizdə əcnəbi tələbələrin sayı azalır
28 Dekabr 2012 17:53 (UTC+04:00)
Aparılan araşdırmalar son illərdə Azərbaycana təhsil dalınca gələn
əcnəbi tələbələrin sayında müəyyən azalmaların olduğunu göstərir.
Halbuki, bir neçə il öncəyə qədər fərqli tendensiya müşahidə
olunurdu. Hazırda əcnəbi tələbələrin azalması faktını ali məktəblər
özləri də təsdiq edir. Məsələn, Bakı Dövlət Universitetinin Xarici
Tələbələrlə iş üzrə dekan müavini Kamran Eyyubov məsələ ilə bağlı
Mövqe. Az saytına aşağıdakı açıqlamanı verib: "Bu azalma nisbi
azalmadır. Azalmanın obyektiv və subyektiv səbəbləri var. Obyektiv
səbəbləri ondan ibarətdir ki, bizim yataqxanamız yoxdur. Bakı
Dövlət Universitetində xarici tələbələrin qalması üçün indiki halda
şərait yoxdur, qaçqınlarla bağlı burada vəziyyət çətindir.
Subyektiv səbəbləri də ondan ibarətdir ki, artıq bazar inkişaf
edir. Biz bu istiqamətdə gərək Təhsil Nazirliyinin rəhbərliyi
altında fəaliyyətə başlayaq ki, bütün Afrika ölkələri, Türkiyə və
digər belə dövlətlər ilə münasibət yaradaq və ordan bizə sistematik
olaraq tələbələr gəlsin.
Digər tərəfdən Azərbaycanda yüksək inkişaf, həyat səviyyəsinin daha
yüksək olması da xarici tələbələrə bir az çətinlik yaradır. Daha
doğrusu, bahalı qiymətlər onların maliyyə durumuna təsir göstərir
və nəticədə azalma da olur".
Təhsil üzrə ekspert Nişat Mehdiyev məsələ ilə bağlı bildirib: "Bizə
xaricdən tələbələr gəlir. Türkiyədən gələn vətəndaş var, Tibb
Universitetinin tələbəsidir. Mən onun ilə söhbət edərkən o bildirib
ki, biz kirayə 300 manata qalırıq. Bu da bizim üçün böyük bir
məbləğdir. Çox çətinlik çəkirik. Tələbələrin yataqxanalar ilə,
qalacaqları yer ilə təmin edilməməyi həm Azərbaycan, həm də
xaricdən gələn tələbələr üçün çox çətinlik yaradır. Yəni baha
qiymətə başa gəlir. Tələbələrin hamısını demək olmaz ki, varlı
ailələrdən gəlir. Sadəcə, o tələbədir. Dövlət tələbədən illik 2500
manat ödəniş alırsa, həm onun qalmağını, yeməyini, həm dərs
vəsaitləri ilə təmin olunmasını təmin etməlidir. Bizim xaricdə
təhsil alan tələbələrimiz var. Onların hamısı yüksək səviyyədə həm
yataqxana ilə, həm yeməklə, həm dərsliklərlə təmin olunur. Ancaq
burda o çətinlik yaradır. Bəlkə tələbə buranı qutarıb, orada
apardığı təbliğat nəticəsində bu azalma baş verir. Yataqxanalarda
komendantlarin özləri də bəzən bunu deyirlər ki, pulunu ver sənə
otaq verim. Yəni nəzarət bir az zəifdir. Başqa məsələlərə gəlincə
isə onu deyim ki, bizim müəllimlərimiz yaxşı dərs deyirlər, savadlı
müəllimlərimiz var. Müəllimlərimizə görə tələbələr heç vaxt şikayət
edə bilməzlər. Bizim gözəl kitabxanalarımız, gözəl dərsliklərimiz
var. Bunlar tələbə azalmasına səbəb ola bilməz. Səbəb, sadəcə,
onların qalmasının baha başa gəlməsi ola bilər".