Yeni qanunla iki soyad istifadəsinə son qoyuldu
9 Yanvar 2013 15:55 (UTC+04:00)
Movqe.Az bildirir ki, İsveçrə yeni ildən
etibarən gündəlik həyatı maraqlandıran bir çox qaydaları qüvvəyə
qoyub. Bunlardan biri də soyadlarda edilən dəyişiklik olub. İstər
qadın hüquqları istərsə də bürokratiyanın yaratdığı çətinlikləri
nəzərə alaraq, İsveçrə iki soyad istifadəsinə son qoyub. Yeni
tənzimləmə yeni ildən etibarən qüvvəyə minib. Belə ki, bu ildən
etibarən evlənən cütlüklərdən hər biri evləndikdən sonra da öz
soyadını ömür boyu daşıya biləcək. Cütlüklərə yeni qanun tək bir
soyad altında birləşmə haqqını da verir. Edilən dəyişikliyə görə,
nigah mərasimində cütlüklər hansı tərəfin soyadı altında yaşamaq
istədiklərini bəyan edəcəklər. Bu vəziyyətdə ənənəvi qaydaya zidd
olaraq kişi də həyat yoldaşının soyadını alaraq həyatına davam edə
biləcək. Köhnə tətbiqə görə, qadınlar subaylıq soyadları ilə
birlikdə yoldaşlarının soyadını da daşıyırdılar. Amma yeni qanunla
bu ləğv edilib. Qadın nigah zamanı ya həyat yoldaşının soyadını
alacaq ya da öz soyadı ilə davam edəcək. Öz subaylıq soyadını
daşımağa qərar verən cütlüklərin uşaqları isə ana-atanın təyin
etdiyi (cütlüklərdən birinin) soyadı daşıyacaqlar. Nigahsız doğulan
uşaqlar birbaşa ananın soyadını alacaq. Ancaq, cütlüklərin ortaq
tələbi ilə uşaq atanın soyadını da istifadə edə biləcək. Yeni
qaydaya görə, evlilik tarixindən asılı olmayaraq köhnə cütlüklər də
bundan faydalana biləcək. Bununla da, evli qadınlar həm subaylıq
soyadlarına geri dönə biləcək, həm də ərinin soyadı ilə birlikdə
iki soyad daşımamaq şanslarından istifadə edə biləcəklər. Rəsmi
nigah dairəsinə müraciət ilə qadınlar soyadlarına qovuşa biləcək.
Amma onlar müraciət üçün yeni şəxsiyyət vəsiqəsi xərci xaric
olmaqla 75 İsveçrə frankı ödəmək məcburiyyətində qalacaqlar.
İki soyadı ilə davam etmək istəyən insanlar isə bu şəkildə davam
edə biləcəklər. Ancaq bundan sonra İsveçrədə iki soyad almaq mümkün
olmayacaq.