Məktəb direktoru ölən uşaqdan danışdı
11 Yanvar 2013 12:10 (UTC+04:00)
Dünən Binəqədi qəsəbəsində yerləşən 182 saylı məktəbdə 5-ci sinif
şagirdi Elmir Babaşovun idman dərsində həyatını itirməsindən sonra
onun ölümü ilə bağlı müxtəlif versiyalar səsləndi. Binəqədi Rayon
Prokurorunun köməkçisi Bəsti Emçiyeva hadisənin mini-futbol üçün
quraşdırılmış qapının uşağın üzərində aşması nəticəsində baş
verdiyini söyləsə də, bəzi məlumatlarda 10 yaşlı məktəblinin
ştanqanı qaldırarkən ağırlıq daşının başına düşüyü
bildirilirdi.
Movqe.az hadisənin hansı səbəbdən baş verdiyini dəqiqləşdirmək ücün
182 saylı məktəbin 5-ci sinif şagirdləri və təhsil müəssisəsinin
direktoru ilə görüşüb. Mərhumla eyni sinifdə oxuyan şagirdlər
bildiriblər ki, hadisə mini futbol ücün quraşdırılmış qapıdan Elmir
turnik kimi istifadə edərkən baş verib. Onların sözlərinə görə,
həmin vaxt idman dərsini tədris edən müəllim zalın yuxarı başında
olub. Məktəbin direktoru Zinyət Tağıyeva isə əməkdaşımıza baş verən
olayın bədbəxt hadisə olduğunu, buna görə, məktəbi günahkar
görməyin doğru olmadığını söyləyib: "Bu bədbəxt hadisədir. Ola
bilərdi ki, Elmir məktəbin həyətində futbol oynayarkən başı daşa
dəyib ölə bilərdi. Buna görə məktəbi günahkar görmək doğru deyil.
Uşaq mini futbol ücün quraşdırılmış qapıdan turnik kimi istifadə
edib. Bu zaman əli qapının setkasına ilişib və qapı üzərinə aşıb.
Buna məktəb neyləsin? Hadisə baş verəndə müəllim zalın yuxarı
başında olub. Yəni uşaqlar başlı-başına olmayıb. Müəllim də haradan
bilərdi ki, qəfil uşaqlardan biri mini-futbol ücün quraşdırılmış
qapıdan turnikdəki kimi asılacaq?"
Qeyd edək ki, faktla bağlı Cinayət Məcəlləsinin vəzifəli şəxsin işə
vicdansız yanaşması və laqeyd münasibəti nəticəsində etdiyi
səhlənkarlıq, ehtiyatsızlıqdan zərərçəkmiş şəxsin ölümünə səbəb
olma (314.2-ci) maddəsi ilə cinayət işi başlanıb.