ATV-yə təcili tibbi yardım çağırıldı
12 Yanvar 2013 11:10 (UTC+04:00)
ATV-də yayımlanan "Tanıdım Səni-2" verilişinin canlı yayımında
problem yaşanıb. Lent.az-ın məlumatına görə, veriliş zamanı öz
bacarığını göstərən "Tok insan" kimi tanınan Azər
Kazımovun halı pisləşib. O, elektrik naqillərini başına
qoşmaqla studiyanın lampalarını yandırıb-söndürüb. Lakin bu zaman
Azərin səhhətində problem yaranıb. Studiyaya təcili tibbi yardım
çağırılıb. Azərin valideynləri də həyəcanlandıqları üçün halları
pisləşib. Digər iştirakçılar arasında təşviş yarandığı üçün zaldan
çıxarılıblar. Bir müddət sonra isə canlı yayım davam etdirilib.
Qeyd edək ki, verilişdə altıncı hissi qüvvətli olan Məryəm Bağırova (Sumqayıt), qeyri-adi səsə malik olan
Hürü Məmmədova və Mehdi
Məmmədov (Ağcabədi), Cahangir Əliyev
(Lerik rayonu), Murad Kərimzadə (Tərtər) və
Elbəy Etibarlı (Qobustan) kimi ifaçılar,
Kənan Cəfərov (Neftçala) və Minayə Şirinova (Ağcabədi) kimi musiqiçilər, Qusardan
seçilən rəqqaslar, Biləsuvardan seçilən idmançılar və digər
iştirakçılar çıxış ediblər.Zaur Baxşəliyev
və əməkdar artist Elza Seyidcahan layihə
boyu Azərbaycanın 22 şəhər və rayonunda, müxtəlif bölgələrdə
çəkilişlər edib, yaradıcı insanları axtarıb, onların istedadları
ilə tanış olublar. Sonra həmin iştirakçılar Bakıya dəvət olunub.
Onlar tanınmış sənətkar-münsiflərin qarşısında çıxış edib. Həftə
boyu istedadlarını nümayiş etdirən iştirakçılar arasından
"yaxşıların yaxşısı" seçilib.
Xatırladaq ki, xalq artisti Faiq
Ağayev, əməkdar artist Elza Seyidcahan və Zaur Baxşəliyev
münsif heyətində oturub. "Tanıdım səni - 2" layihəsi 2012-ci ilin
aprel ayının 7-dən başlayıb. Artıq 2 ildir, hər həftənin cümə
günü, "Azad Azərbaycan" telekanalında "Tanıdım səni" layihəsi
yayımlanır.