Bu gün Bakıda əsgər ölümünə etiraz olaraq keçirilən aksiyada bir neçə nəfər polis tərəfindən saxlanılıb. Bu barədə APA-ya açıqlamasında Bakı Şəhər Baş Polis İdarəsinin rəis müavini, polis polkovniki Səhlab Bağırov məlumat verib. S.Bağırov qeyd edib ki, bir qrup gənc paytaxtın Fəvvarələr Meydanında razılaşdırılmamış aksiya keçirməyə cəhd göstərib: "Polis qanunsuz aksiya cəhdinin qarşısını alıb. Aksiyada bir neçə nəfər saxlanılıb. Yəqin ki, onlar inzibati qaydada cəzalandırılacaqlar".
Qeyd edək ki, bu gün Azərbaycan Ordusunun əsgəri Ceyhun
Qubadovun müəmmalı ölümü ilə əlaqədar bir qrup gəncin sosial
şəbəkələr vasitəsilə Bakının Fəvvarələr meydanına təyin etdiyi
aksiya keçirilib. Aksiyada hərbi xidmət zamanı dünyasını
dəyişmiş əsgərlərin şəkilləri, Azərbaycan və Türkiyənin bayraqları
qaldırılıb. Aksiyaçılar "Şəhidlər ölməz, Vətən bölünməz!",
"Əsgər ölümünə son!" və digər şüarlar səsləndiriblər. Aksiyanı
yerli hüquq müdafiəçiləri, ATƏT-in Bakı ofisinin və bəzi
səfirliklərin nümayəndələri izləyiblər.