"Neft gəlirlərinin çəkisinin büdcə gəlirlərinin strukturunda
artması obyektiv haldır". Lent.az-ın verdiyi məlumata görə, bunu
Milli Məclisdə büdcə müzakirələri zamanı iqtisadi siyasət
komitəsinin sədri Ziyad Səmədzadə söyləyib. Ziyad Səmədzadə deyib
ki, 3 ildə büdcə gəlirləri və xərcləri 44 faiz artıb: "Hazırda
Azərbaycanda adambaşına düşən gəlir xarici borcla müqayisədə 4,2
dəfə çoxdur. Bu, ciddi bir uğurdur".
O bildirib ki, Azərbaycan hökuməti əlvan və qara metallurgiyanın
inkişafı sahəsində addımlar atır. Ziyad Səmədzadə qeyd edib ki,
Azərbaycanda dünya bazarına məhsullar çıxarmaq üçün müasir
tələblərə cavab verən neft-kimya kompleksi yaradılır. Onun
sözlərinə görə, Azərbaycanda səmərəli fəaliyyət göstərən müdafiə
sənayesi yaradılıb: "Bəzən deyirlər ki, 2012-ci ilin dövlət
büdcəsində infrastruktura qoyulacaq dövlət investisiyaları çoxdur.
Özəl sektorun bu gün bu həcmdə vəsait qoymağa potensialı yoxdur.
Ona görə də dövlətin bu investisiyaları qoyması lazımdır".
Ziyad Səmədzadə nəzərə çatdırıb ki, 2012-ci ildə büdcə kəsiri 0,9
faiz olacaq: "Biz kəsirsiz büdcə tərtib edə bilərdik. Kəsir cəmi
300 milyon manat olacaq. Daxildə borclanmaya getmək, maliyyəni
tənzimləmək üçün bu addımı atdıq. Azərbaycan büdcəsinin
formalaşdırılması problemi, borc problemi yoxdur. ABŞ-ın xarici
borcu ÜDM-ə bərabərdir. İtaliyada, Yunanıstanda borc ÜDM-in 160-170
faizinə bərabərdir. Azərbaycanda isə xarici borc ÜDM-in 9,2 faizi
həcmindədir. Söhbət 5 milyard dollardan gedir. Bizim beynəlxalq
maliyyə təşkilatları ilə heç bir problemimiz yoxdur. Borc almasan,
borc verməsən, sənə yaxşı baxmazlar. Çünki açıq iqtisadiyyat
qururuq ".
Ziyad Səmədzadə qeyd edib ki, qeyri-neft sektorunda vergilər
sürətlə artır: "60-70 faiz könüllü vergi ödəyir. Büdcə xərclərinin
strukturu beynəlxalq tələblərə cavab verir. Hesablama Palatasının
da fəaliyyətini xüsusi vurğulamaq istəyirəm. Beynəlxalq təşkilatlar
Milli Məclis və Hesablama Palatasının fəaliyyətinə baxanda
Azərbaycanda şəffaflığın olduğunu vurğulayır".