İlham Əliyev Norveç Krallığının xarici işlər nazirini qəbul edib
14 Yanvar 2013 16:37 (UTC+04:00)
Azərbaycan prezidenti İlham Əliyev yanvarın 14-də Norveç
Krallığının xarici işlər naziri Espen Bart Eidenin başçılıq etdiyi
nümayəndə heyətini qəbul edib. APA-nın məlumatına görə, E. B. Eide
Norveçin "Statoil" şirkətinin uzun müddət Bakıda fəaliyyət
göstərməsini əməkdaşlığın yaxşı nümunəsi kimi dəyərləndirib.
İkitərəfli münasibətlərin möhkəm bünövrəsi olduğunu deyən qonaq
ölkələr arasında tərəfdaşlıq əlaqələrinin daha da inkişaf
etdirilməsi üçün böyük imkanların mövcudluğunu vurğulayıb. Öz
növbəsində, prezident İlham Əliyev Azərbaycanın beynəlxalq neft
şirkətləri ilə əməkdaşlığının ilkin mərhələsində Norveçin "Statoil"
şirkətinin ilk regional nümayəndəliyinin Bakıda fəaliyyətə
başlamasının önəmini qeyd edib. Dövlət başçısı hazırda ölkələr
arasında əlaqələrin daha da inkişafı ilə bağlı məsələlər ətrafında
işlərin uğurla davam etdirildiyini vurğulayıb. Görüşdə Azərbaycanla
ilə Norveç arasında ikitərəfli münasibətlərin müxtəlif
istiqamətlərdə, o cümlədən enerji sahəsində inkişafından məmnunluq
ifadə olunub, əməkdaşlığın gələcəkdə daha da genişləndirilməsi üçün
yaxşı perspektivlərin olduğu qeyd edilib.