Gürcüstan tərəfi Təhsil Nazirliyini beş aydır gözlədir
15 Yanvar 2013 15:10 (UTC+04:00)
Azərbaycanın Təhsil Nazirliyininin Gürcüstandakı Azərbaycan
məktəblərinə çap etdiyi dərsliklər istifadəsiz qalıb. Bu məlumatı
Movqe.az-a Təhsil Nazirliyinin dərslik və nəşriyyat şöbəsinin
müdiri Faiq Şahbazlı verib. Onun sözlərinə görə, humanitar yardım
məqsədilə Gürcüstandakı azərbaycanlı məktəbliləri üçün hazırlanan
dərslikləri bu günədək Gürcüstan tərəfi qəbul etməyib: "Biz
dərsliklərin vaxtında çatdırılması üçün Gürcüstan tərəfinə
dəfələrlə məktub göndərmişik. Amma onlar indiyədək dərsliklərin
göndərilməsi ilə bağlı məktubumuza müsbət cavab verməmişdilər. Axır
ki, ötən ay onlardan cavab gəldi. Bizdən sorğu istədilər, onu da
göndərdik. Amma hələdə dərsliklərin Gürcüstan tərəfində qəbul
ediləcəyi barədə rəsmi bildiriş gəlməyib. Dərsliklər də hələki
saxlanılır, istifadəsiz qalıb. Gürcüstandan cavab gözləyirik".
Şöbə müdiri işə Azərbaycanın Gürcüstandakı səfirinin də dəfələrlə
qarışdığını, amma bunun bir nəticəsinin olmadığını
bildirdi.
F.Şahbazlı bildirdi ki, Azərbaycanın Təhsil nazirliyi lazımi sayda
ana dili və ədəbiyyat dərsliklərini hələ sentyabr ayının əvvəlindən
hazırlayıb. Qeyd edək ki, Gürcüstandakı Azərbaycan məktəblərinin
ana dilində olan dərsliklərə tələbatını Azərbaycanın Təhsil
Nazirliyi ödəyir.