Böyük Britaniyanın Azərbaycandakı səfiri Kerol Krofts ölkəsi ilə Azərbaycan arasında münasibətlərin mövcud səviyyəsindən razılığıın bildirib. Azərbaycan ilə Böyük Britaniya arasında əlaqələr hazırda həmişəkindən daha güclüdür deyən səfir bildirib ki, Böyük Britaniya Azərbaycanda ən iri xarici investordur və bu mövqeyini qoruyub saxlamaq niyyətindədir.
Böyük Britaniyanın bir sıra nümayəndə heyətlərinin yaxın
vaxtlarda Azərbaycana səfər etmək niyyətində olduqlarını bəyan edən
səfir bildirib ki, hələlik təfərrüatlar məlum deyil. O həmçinin
əlavə edib ki, gələn ilin əvvəlində Azərbaycanla Böyük Britaniya
arasında ticari-iqtisadi əməkdaşlıq üzrə hökumətlərarası
komissiyanın ikinci iclasının keçirilməsi planlaşdırılıb.
İngilis iş adamlarının Azərbaycanda işləməyə həmişə böyük maraq
göstəriblər. Həm də bu arzu dünənin-srağagünün söhbəti deyil. XIX
əsrin ortalarından etibarən Bakıda neft sənayesi “ildırım” sürətilə
inkişaf edən vaxtlardan ingilislər Azərbaycana ayaq açıblar.
Müstəqilliyə qovuşandan sonra Azərbaycan neft sənayesinin
inkişafına töhfə vermək arzusunda olan xarici şirkətlərin
sayı-hesabı yox idi. Lakin Azərbaycan rəhbərliyi çoxsaylı
şirkətlərin işini təhlil edəndən sonra üstünlüyü dünya nəhəngi
“British Petroleum” şirkətinə verdi. Təbii ki, razılaşmanın əldə
edilməsində ingilislərin vaxtilə Bakıda qazandıqları iş təcrübəsi
də əhəmiyyətli rol oynayıb. Bu gün Xəzər sektorunda ən böyük
neft-qaz yatağı olan «Azəri-Çıraq» platforması məhz britaniyalı
mütəxəssislərin rəhbərliyi ilə istismar olunur.
Artıq neçə illərdir Azərbaycanda işləyib təcrübə qazanmış şirkətlər
isə get-gedə yerlərini, necə deyərlər, möhkəmlədirlər. Bu günlərdə
Azərbaycanda qızıl, gümüş və mis hasilatı ilə məşğul olan Böyük
Britaniyanın "Anglo-Asian Mining Plc." şirkəti "Gədəbəy" yatağında
daha bir mənbədə qızıl kəşfiyyatı üçün yeni lisenziya alıb.
Yeni yataq “Uğur” adlandırılıb. “Ugur” şirkətin qələviləşdirilmiş
plantasiyasının 3 km Şimal-Qərbində yerləşir. Aparılmış testlər və
qazıntı nümunələri ərazidə 87% qızıl olduğunu müəyyən etməyə imkan
verib. Şirkətin baş icraçı direktoru Rza Vəziri deyib ki, bu
yatağın çox böyük əhəmiyyəti var: “İnanıram ki, "Anglo-Asian" çox
əhəmiyyətli mövqedədir və bu mövqe onun minerallarla zəngin olan
"Gədəbəy"də davamlı olaraq hasilatına şərait yaradacaq”.
Kəşfiyyat-qazıntı işlərinin nəticələrinə görə, aparılmış 20
müxtəlif testin nəticəsində aşkar edilib ki, qiymətli metal 360
metr dərinliyə qədər yerləşir. Əsas diqqət çəkən isə 34 metrə qədər
hər ton üçün 0,39 qram, 13 metrə 0,83 q/t və 35 metrə 5,45 q/t-dur.
Açıqlamada qeyd edilir ki, gələcəkdə “Uğur”un kəşfiyyat ərazisi 1
500 metrə qədər cənuba genişləndiriləcək. Artıq "Anglo-Asian Mining
Plc." işin ilkin fazasında ümumi dərinliyin ölçülməsi və
minerallaşmanın xüsusiyyətlərinin öyrənilməsinə başlayıb. Əsas
işlərə isə 2017-ci ildə başlanması nəzərdə tutulur.
Bu minvalla Azərbaycanla Böyük Briyaniya arasında tarixən
formalaşmış iqtisadi əlaqələr yeni hüdudlara çıxacaq və dünyanın
maliyyə mərkəzi sayılan Londondan Bakıya investisiya axını
çoxalacaq.
N.NOVRUZ