"TAP layihəsinin reallaşdırılması İtaliyaya bir çox strateji
üstünlüklər verir".Movqe.az xəbər verir ki, bunu İtaliya mətbuatına
SOCAR-ın sərmayələr və marketinq üzrə vitse-prezidentinin müavini
Vitali Bəylərbəyov bildirib.
"Söhbət "Cənub Qaz Dəhlizi" kimi iri bir layihənin komponenti olan
layihədən gedir. Bu layihənin reallaşdırılması nəticəsində
Azərbaycan qazı avropalı, o cümlədən italiyalı istehlakçılara
çatdırılacaq. Bildiyimiz kimi, İsrail, İran, İraq və digər ölkələr
bu layihə vasitəsilə hasil etdiyi qazı Avropaya çatdırmaq
arzusundadır. Bu isə İtaliya bazarı üçün bir çox üstünlüklər verir.
Üstünlüklər arasında rəqabətqabiliyyətli qiyməti, stabil təchizatı,
fiskal amilləri, yeni iş yerlərinin açılmasını göstərə bilərik.
Nəticə etibarilə bu amillər ümumilikdə İtaliya iqtisadiyyatına
müsbət təsir göstərəcək. TAP-ın tikintisinə 20 min insan cəlb
olunacaq. Uzaq perspektivdə bir çox daimi iş yerlərinin yaradılması
da aydındır. İtalyan şirkətləri üçün də bir sıra üstünlüklər var.
Təkcə subpodratçılarla TAP-ın tikintisi çərçivəsində təxminən 6
milyard avro məbləğində müqavilələr imzalanıb", - deyə V.
Bəylərbəyov bildirib.
O əlavə edib ki, hələlik nəql olunacaq təbii qazın qiyməti məlum deyil: "Qiymət bazar tendensiyalarına müvafiq təyin olunacaq. Bir şey dəqiqdir ki, qiymət başqa mənbələrdən nəql olunan qazın qiyməti ilə müqayisədə rəqabətqabiliyyətli olacaq. Rəqabətin artması qiymətə təsir edir".