“Müharibə kabusu Dağlıq Qarabağda yenidən göründü”. Bu barədə Rusiyanın “Nezavisimaya qazeta” nəşri yazıb. Son vaxtlar cəbhə xəttində tez-tez pozulan atəşkəs rejiminə diqqət çəkən nəşr qeyd edib ki, “dördgünlük müharibə”dən sonra müşahidə olunan sabitlik artıq geridə qaldı.
“Təmas xəttində gərginlik yavaş-yavaş, amma davamlı olaraq
yüksəlir. Atəşkəsin pozulması statistikası bunu əyani şəkildə
təsdiq edir. Apreldə “dördgünlük müharibə”dən sonra əldə oluna
nisbi sakitlik görünür, keçmişdə qaldı. Əvvəlcə tərəflər gündəlik
atəşkəs pozuntularından onlarla olduğundan danışırdı, indi
atəşkəsin pozulma sayı yüzlərlərdir. Bu, getdikcə daha da yüksələ
bilər”, - deyə nəşr təmas xəttində baş verənlərə diqqət çəkir. Nəşr
bildirir ki, müharibə kabusu yenidən Qarabağda görünür və ciddi
qarşıdurmanın olması ehtimalı böyükdür.
Elə siyasilər də rus nəşrinin xəbərdarlığını real hesab edirlər.
İntensiv pozulmağa başalyan atəşkəs fonunda müharibə yenidən
alovlana bilər. Qeyd edək ki, Prezidenti Administrasiyası
rəhbərinin müavini, Xarici əlaqələr şöbəsinin müdiri Novruz
Məmmədov “Azərbaycan” qəzetində dərc olunan “Müstəqil Azərbaycan
dünyada böyük nüfuza, güclü beynəlxalq mövqeyə sahibdir” başlıqlı
məqaləsində bu məsələyə toxunaraq bildirib ki, Qarabağ münaqişəsi
hər an qaynar müharibəyə səbəb ola bilər.
Politoloq Oqtay Sadıqzadə məsələ ilə bağlı bildirdi ki,
“Nezavisimaya qazeta” nəşri Kreml dairələrinə yaxın mətbu orqandır:
“Çox məlumatlı nəşrdir. Bundan başqa, əksər ekspertlərin fikri
budur ki, cari il 4 günlük aprel döyüşlərindən sonra cəbhə xəttində
fundamental dəyişiklər baş vermədiyinə, danışıqlar prosesində rəsmi
İrəvan “tormozladığına” görə, Azərbaycanın hərbi üsula əl atmaq
ehtimalı kifayət qədər yüksək olaraq qalır. Yəni, siyasi
vasitələrin tükəndiyi dövrə qədəm qoymuşuq. Belə olan halda
müharibə ehtimalı istisna edilmir. Bu ehtimal yüksək faiz altında
qüvvədə qalmaqdadır.
ATƏT-in Minsk qrupu müəyyən siyasi fəallığını yoxdur. Eyni zamanda
Rusiyanın Ermənistana 200 milyon dollarlıq krediti ilə silah və
“İsgəndər” raketlərinin verdiyi gördük. Rəsmi İrəvanın günahı
ucbatından Azərbaycan dövlətinin də gələcəkdə silahlanmaya müraciət
edəcək. Elə cənab Prezident İlham Əliyev Pakistan baş nazirini
qəbul edərkən də qeyd etdi ki, gələcəkdə Azərbaycan Pakistan və
digər dövlətlərdən silah almaqda davam edəcək. Belə olan halda
Qarabağ istiqamətində müharibə ehtimalı öz aktuallığını
saxlayır.
Düzdür, beynəlxalq arenada baş verən hadisələrə də fikir
verməliyik. Beynəlxalq əlverişli an formalaşan kimi Azərbaycan
dövlətinin növbəti hərbi kampaniya çərçivəsində öz ərazi büötvlüyün
təmin etmək istiqamətində addımlar atacağına şübhə yoxdur. 1994-cü
ildən ATƏT-in Minsk qrupunun yarıtmaz fəaliyyəti bizə başqa çıxış
yolu qoymayıb. O baxımdan Rusiya qəzetinin fikirləri ilə
razılaşmalıyıq. Cəbhə xəttində gərignliyi istisna etmək olmaz”.
“Atlas” Araşdırmalar Mərkəzinin rəhbəri, politoloq Elxan Şahinoğlu
da rus nəşri ilə razılaşdığını bildirir: “Uzun illər olduğu kimi,
son döyüşlərdən sonra da danışıqlarda irəliləyiş yoxdur. Yenə də
atəşkəs intensiv pozulur.
Bundan başqa, Ermənistan təxribatlar apararaq Dağlıq Qarabağda
hərbi təlimlər həyata keçirir. Hansı ki, məhz bunlar aprel
döyüşlərinə səbəb olmuşdu. Eyni səbəbələr yenə də qalmaqdadır. Bu,
o deməkdir ki, danışıqlarda irəliləyiş yoxdursa, təxribatlar davam
edirsə, aprel toqquşmalarının yenidən təkrarlanma ehtimalı
artır”.
Mübariz BAYRAMOV