İŞİD Kərkükə hücum edib

21 Oktyabr 2016 16:29 (UTC+04:00)

Bu gün yerli vaxtla səhər saat 06.00 radələrində İŞİD terror təşkilatı Kərkükdə təhlükəsizlik orqanlarının binalarına hücum təşkil edib.

Movqe.az-ın “Hürriyet” qəzetinə istinadən verdiyi məlumata görə, öncə Kərkük şəhər mərkəzindən 40 km şimal-qərbdəki Dibis rayonunda İran şirkəti tərəfindən inşa edilən elektrik stansiyasına hücum olub. 3 terrorçudan biri hücum zamanı öldürülüb, 2 terrorçu isə elektrik stansiyasına daxil olaraq üzərindəki partlayıcı qurğunu işə salıb. Nəticədə 12 iraqlı elektrik və 4 iranlı ölüb.

Kərkük şəhər mərkəzində isə onlarla İŞİD terrorçusu atıcı silahlar, əl qumbaraları və qumbaraatanlarla eyni vaxtda 5 istiqamətdən hücuma keçib.

Qeyd edək ki, Hazırda türkmənlər, kürdlər və ərəblərin yaşadığı Kərkük İraq mərkəzi hökuməti və Şimali İraq kürd muxtariyyəti arasında əsas mübahisə mövzularından biridir. Tarixi türkmən şəhəri olan Kərkükə ABŞ-ın İraqa müdaxiləsindən sonra çoxlu sayda kürd köçürülüb və şəhərin demoqrafik durumu dəyişdirilib. Mosulun İŞİD tərəfindən ələ keçirilməsindən sonra İraq ordusunun birləşmələri bölgədən çəkilib və o zamandan Kərkükə Məsud Bərzaniyə bağlı peşmərgələr nəzarət edir. Ancaq hazırda peşmərgə qüvvələrinin əhəmiyyətli qismi Mosul əməliyyatına cəlb edilib. Bu da şəhərdə təhlükəsizliyin qorunması sahəsində ciddi boşluqlara yol açıb. Bu səhər İŞİD-in müxtəlif istiqamətlərdə hücum aksiyaları həyata keçirməsinə peşmərgə qüvvələrinin effektiv reaksiya verə bilməməsi, artıq 10 saata yaxındır ki, döyüşlərin davam etməsi Mosul cəbhəsindən peşmərgə qüvvələrinin bir hissəsinin Kərkükə qaytarılması ilə nəticələnib. Eyni zamanda şiə könüllülərinin yaratdığı və İrana yaxın Haşdi-Şabi qüvvələrinin bir qisminin də hazırda Kərkük istiqamətində hərəkətə başladığı bildirilir.

Son məlumata görə, İŞİD terrorçularının hücumu nəticəsində 6 peşmərgə olmaqla, 24 nəfər öldürülüb. Döyüşlərlə 12 İŞİD terrorçusunun məhv edildiyi bildirilir. Şəhərdə fövqəladə vəziyyət elan olunub, cümə namazı qılınmayacaq.