Daha bir Avropa İttifaqı (Aİ) ölkəsinin rəhbəri Azərbaycanda səfər oldu. Xorvatiya prezidenti Kolinda Qrabar-Kitaroviç ilə görüş zamanı Azərbaycan- Xorvatiya, Azərbaycan-Aİ münasibətlərinə toxunuldu.
Prezident İlham Əliyev ikitərəfli əməkdaşlığı inkişaf etdirməyin
zəruriliyiən diqqət çəkərək qeyd etdi: “Xorvatiyanın mühüm rol
oynadığı Avropa İttifaqı ilə Azərbaycan arasında əməkdaşlıq var.
Bütün bu sahələrdə daha çox irəliləyiş görmək istəyirik. Düşünürəm
ki, ölkələrimiz bir çox sahədə yaxın tərəfdaşlıq əlaqələri qurub.
Biz xüsusən, ticarət, iqtisadi inkişaf, şirkətlər arasında əlaqələr
sahəsində daha nələr edə biləcəyimizə nəzər salmalıyıq”.
Siyasilər də ölkəmiz üçün Avropa ilə əməkdaşlığın prirotet olduğunu
qeyd edirlər. Azərbaycan Milli Strateji Təhqiqatlar Mərkəzinin
sədri, politoloq Natiq Miri bildirdi ki, Avropa İttifaqı Azərbaycan
ilə əməkdaşlığı genişləndirməkdə maraqlıdır: “Bu maraq bir neçə
Avropa İttifaqı ölkələrinin rəhbərinin Azərbaycana səfərləri
çərçivəsində ortalığa qoyulub. Avropa Parlamenti, Avropa Şurası,
həm də Avropa İttifaqı komissarları səviyyəsində Azərbaycana
səfərlər olub. Onlar Azərbaycan ilə münasibətləri daha da
dərinləşdirmək, strateji əməkdaşlıqda maraqlı olduqlarını
bildiriblər.
Həmçinin Avropa İttifaqı ilə Azərbaycan arasında strateji
əməkdaşlıq istiqamətində konkret sənəd hazırlanır. Bu ilin sonuna
qədər həmin sənədin imzalanması gözlənilir. Xorvatiya Avropa
İttifaqının üzvüdür. Xorvatiyanın Azərbaycan ilə əməkdaşlıqda
maraqlı olması, Azərbaycanın maraqlarını Avropa İttifaqında müəyyən
mənada dəstəkləməsi dövlətimiz üçün müsbət addımdır. Onu da nəzərə
almaq lazımdır ki, son zamanlar Avropa İttifaqı məkanından
Azərbaycana səfərlər intensivləşib. Bu səfərlər də əsasən Dağlıq
Qarabağ probleminin nizamlanması ilə bağlıdır. İndiki şəraitdə
nəzərə alaq ki, ABŞ və Rusiya bu məsələdə passivlik nümayiş
etdirir. Eyni zamanda Ermənistan da qeyri-konstruktiv və dağıdıcı
mövqeyi ilə prosesi əngəlləmək istəyirsə, Avropa məkanı bu
məsələnin sülh yolu ilə nizamlanması üçün hərəkətə keçib. Bu da
Aİ-nin maraqları çərçivəsindədir. Çünki, gələn ildən «Cənub Qaz
Dəhlizi» layihəsi reallaşacaq. Bu fonda Aİ Dalıq Qarabağ
probleminin tənzilənməsində maraqlıdır ki, gələcəkdə layihədə
hansısa təhlükə yaşanmasın.
Aİ Avropa məkanında münaqişə ocağı istəmir. Ona görə də
münaqişələrin həllində maraqlıdır. Bu baxımdan Xorvatiya
prezidentinin ölkəmizə səfəri və Azərbaycan ilə əməkdaşlıqda
maraqlı olması bütövlükdə müsbət tendensiyadır. Eyni zamanda
Azərbaycan Aİ-nin ölkələrinin hər birini əməkdaşlığa sövq etməklə
düzgün siyasət yürüdür. Çünki, Aİ dünyada ciddi siyasi, iqtisadi
güc birliyidir. Qərb dünyasının əhəmiyyətli hissəsidir. Eyni
zamanda Dağlıq Qarabağ probleminin həllində Aİ-nin önəmli rolu var.
Belə bir əhəmiyyətli birliyin Azərbaycanın yanında olması ölkəmiz
adına müsbət hadisədir”.
Digər politoloq Adıgözəl Məmmədov bildirdi ki, Azərbaycan Avropa
qitəsinə aid olan dövlətdir: “Müəyyən mənada da Avropa dəyərlər
sisteminin daşıyıcısı olan dövlətik. Belə bir dövlətin Avropa
məkanı ilə əməkdaşlıq etməsi üçün yetərincə imkanları
mövcuddur.
Nəzərə alaq ki, artıq Avropada geniş yayılmış Azərbaycan diaspor
nümayəndələri fəaliyyət göstərir. Azərbaycan xarici ticarət
dövriyyəsinin 73.6 faizi məhz Avropa dövlətlərilədir. Amma bəzən
Avropanın müəyyən dairələri yersiz, qərəzli bəyantları ilə bu
münasibətlərə bir qədər kölgə salır. Bizim prioritet inteqrasiyamız
məhz Avropa olmalıdır. Bu da belədir. Əslində, elə Xorvatiya
prezidenti ilə görüş zamanı ölkə rəhbəri tərəfindən söylənilən
fikirlər də məhz həmin qərəzli dairələrə istiqamətlənmişdi”.
Mübariz BAYRAMOV