Abort -sosial göstəriş əsas tutulmalıdır, yoxsa qadının sağlamlığı?
21 Yanvar 2013 17:29 (UTC+04:00)
Azərbaycanda abortun həyata keçirilməsinə xüsusi yaradılmış
həkimlər konsiliumu qərar verəcək. Mətbuata bu barədə çıqlama verən
Milli Məclisin Sosial siyasət komitəsinin sədr müavini Musa Quliyev
bildirib ki, parlamentin yaz sessiyasında bu məsələnin
qanunvericiliyə daxil ediləcəyi gözlənilir. Onun sözlərinə görə,
"Reproduktiv sağlamlığın qorunması haqqında" qanuna təklif olunan
maddədə qeyd olunub ki, uşağın 12 həftəliyindən 22-ci həftəliyinə
qədər olan dövrdə sosial göstərişlərə görə abort edilməsi həkim
konsiliumunun qərarı ilə həyata keçirilə bilər: "Azərbaycanda dölün
12 həftəsinədək abort etdirmək ananın müstəsna hüququdur. Söhbət 12
həftədən 22 həftəyədək sosial göstərişlərə görə abortun
edilməsindən gedir. Misal üçün kasıb ailədir və fikirləşir ki,
uşağı saxlaya bilməz və yaxud hamiləlik dövründə uşağın atası vəfat
edir, ana uşağı tək böyütməyi çətin hesab edir, digər halda qadın
cinsi təcavüzə məruz qalıb və hamilə qaldığını gec bilir. Hazırkı
dövrdə aborta qərar verən həkim uşağın valideynləri ilə razılığa
gələrək əməliyyatın sosial göstərişlərə görə olduğu barədə rəy verə
bilər. Lakin konsilium olduqda artıq bir neçə həkimin rəyi nəzərə
alınmalıdır", - Quliyev deyib. Komitə sədrinin müavini qeyd edib
ki, "Reproduktiv sağlamlığın qorunması haqqında" qanun qəbul
olunandan sonra qanunun icrası məqsədi ilə həkim konsiliumun
yaradılması ilə bağlı müvafiq qərar imzalanacaq.
Ginekoloqlar isə, sosial göstərişin heç bir halda tibbi göstərişi
önləməsinə icazə verilməyəcəyini söyləyirlər. "Qadın Krizis
Mərkəzi"nin ginekoloqu Təranə Həsənova deyir ki, qanuna belə bir
əlavə olarsa mütləq orada yenədə tibbi göstərişin üstünlüyü qeyd
olunmalıdır: "Sosial göstəriş əsasında abort bu gün də var. Bizə
müraciət edən hamilə qadınlar arasında sosial vəziyyəti imkan
vermədiyinə görə, abort etdirmək istəyənlər çox olur. Amma
hamiləliyini sosial vəziyyətinə görə, pozdurmaq istəyən hər
qadının istəyi yerinə yetirilmir. Bunun üçün qadından özünün,
ərinin işləmədiyni, sosial statuslarının aşağı olduğunu təsdiqləyən
sənədlər tələb edilir.Əgər qadın yaşadığı ərazinin icra
strukturundan, Mənzil İstismar İdarəsindən, Məşğulluq orqanından
sənədlər təqdim edirsə biz həmin qadının abortuna tibbi göstəriş
olmasa belə qərar veririk. Amma abort qadının sağlamlığını təhlükə
altına qoyursa onun sosial vəziyyəti hamiləliyin pozulmasına əsas
kimi götürülmür. Çünki belə bir halda məsuliyyət həkimin boynunda
qalır. Bundan əlavə, heç bir tibb işçisinin ixtiyarı yoxdur ki,
sosial vəziyyəti nəzərə alıb hamiləliyin pozulmasının qadının
sağlamlığına zərərli olduğunu bilə-bilə bu addımı atsın. Belə bir
qanun olarsa belə, biz ginekoloqlar hamilə qadının öncə
sağlamlığını nəzərə alacağıq. Əgər hamilənin sağlamlığı abortla
təhlükə altına düşürsə, onun yaşamaq üçün evi olmasa belə
hamiləliyin pozulması yolverilməzdir. Odur ki, qanunda bu nəzərə
alınmalıdır".