Tolik Aygün Kazımova ilə işbirliyinə son qoydu
22 Yanvar 2013 10:36 (UTC+04:00)
Xalq artisti Aygün Kazımova və məşhur prodüser Tolik (Tarix Əliyev)
yollarını ayırdılar. ANS PRESS-in məlumatına görə, prodüser bu
barədə şəxsi "Facebook" bəyan edib və bu açıqlaması ilə son
zamanlar gəzən söz-söhbətlərə nöqtə qoydu.
Tolik Aygün Kazımova ilə işbirliyinə son qoyduqlarını belə ifadə
edib: "Bir il ərzində çalışdığım Aygün Kazımova ilə iş
fəaliyyətimizə son qoyuldu. Bu, ikitərəfli razılaşma əsasında baş
verdi. Hamıdan bunu düzgün formada təhlil etməyi xahiş edirəm.
Fanatlara, "Facebook" istifadəçilərinin nəzərinə çatdırım ki,
hazırda Aygun xanımla aramızda heç bir inciklik olmayıb. Və,
ayrılmağımız normal şəkildə həyata keçdi".
Qeyd edək ki, prodüser Aygün Kazımova ilə işbirliyinə müğənniyə
"Diva" titulu verməklə başlamışdı. Bunun ardınca isə Tolikin
peşəkar fəaliyyətinin nəticəsi olaraq qısa müddət ərzində bir çox
uğurlu layihələr həyata keçirilmişdi.