LAYİHƏNİN İSTİQAMƏTİ: “Regionların sosial-iqtisadi inkişafının təşviq edilməsi”
22 Yanvar 2013 16:36 (UTC+04:00)
Bu gün ölkə regionlarının sosial-iqtisadi tərəqqisində özəl sektor
getdikcə daha böyük rol oynamağa başlayır. Bunu şərtləndirən ümdə
səbəblərdən biri isə aqrar sektorda həyata keçirilən islahatlar,
qeyd edilən istiqamətdə vaxtında zəruri addımların atılmasıdır.
Qeyd edilənlər bazar iqtisadiyyatının prinsiplərinin ölkəmizdə
uğurlu tətbiqinin göstəricisi, həm də bunun regionların tərəqqisinə
böyük töhfə verməsinin real təsdiqidir.
Ümumiyyətlə, aydındır ki, zamanın tələblərinə cavab verən
sosial-iqtisadi inkişafın yolu məhz bazar iqtisadiyyatından keçir.
Bazar iqtisadiyyatının əsas cəhətlərindən biri isə mülkiyyətin yeni
formalarının, ilk növbədə özəl mülkiyyətin yaranmasını özündə əks
etdirdiyindən bu proses Azərbaycanın qarşısında da taleyüklü məsələ
kimi durmuşdu. Dünya təcrübəsi isə onu da təsdiq etmişdi ki, özəl
mülkiyyət fərdi azadlığın əsasını təşkil edir və bu da öz
növbəsində ayrıca götürülümüş fərdin özünütəsdiq, ifadənin zəruri
şərti kimi çıxış edir. Müxtəlif ölkələrdə gedən özəlləşdirmə
prosesləri məzmunu, funksiyaları, istifadə edilən formalar və
nəticələrinə görə biri-birindən əhəmiyyətli dərəcədə fərqlənir. Bu
səbəbdən özəlləşdirmə proseslərinə başlamazdan öncə dəqiq
düşünülmüş, rasional xarakterli addımların atılması, uğurlu
nəticələrə yol açan dünya təcrübəsinin tətbiq olunması zəruri şərt
kimi çıxış edirdi.
Lakin ulu öndər Heydər Əliyevin ikinci dəfə hakimiyyətə qayıdışına
qədər iqtidarda olan qüvvələrin yarıtmaz siyasəti xüsusi mülkiyyətə
əsaslanan bazar iqtisadi sisteminə keçidi, bu kontekstdə dövlət
mülkiyyətinin özəlləşdirilməsini mümkünsüz edirdi. Düzdür, dövlət
mülkiyyətinin özəlləşdirilməsi məqsədilə 1992-ci ildə Azərbaycan
hökumətinin qərarı ilə Dövlət Əmlak Komitəsi yaradılaraq fəaliyyətə
başlamış, 1993-cü ilin yanvarında isə "Azərbaycan Respublikasında
dövlət mülkiyyətinin özəlləşdirilməsi haqqında" qanun qəbul
edilmişdi. Ancaq özəlləşdirmənin nəzəri-qanunverici bazasının
hazırlanmasında ciddi nöqsanlara yol verilmişdi və onun bu şəkildə
tətbiqi Azərbaycanın üzləşdiyi iqtisadi böhranı daha da
dərinləşdirə bilərdi. Belə şəraitdə təbii ki, bazar iqtisadiyyatı
prinsipləri əsasında milli iqtisadiyyatın inkişafını təmin etmək,
dövlət mülkiyyətinin özəlləşdirilməsinin düzgün, ədalətli və
pozitiv dünya təcrübəsinin hərtərəfli öyrənilərək tətbiqini
reallaşdırmaq mümkün deyildi.
Yalnız Heydər Əliyev ölkə rəhbərliyinə qayıtdıqdan sonra
özəlləşdirmə proseslərinin sürətləndirilməsinə, bu zaman Azərbaycan
reallıqları nəzərə alınmaqla qabaqcıl dünya təcrübəsinin tətbiq
edilməsinə, sürətli inkişafa xidmət edən iqtisadi siyasət həyata
keçirildi. Bu fonda dövlət mülkiyyətinin özəlləşdirilməsinin
qanunvericilik bazası yaradıldı və müvafiq dövlət proqramları
təsdiq olundu. Eləcə də özəlləşdirmənin başlıca məqsədləri
sırasında müvafiq dövlət proqramlarında təsbit olunduğu kimi,
təsərrüfat subyektləri üçün xüsusi mülkiyyət və sərbəst rəqabət
prinsipləri əsasında öz-özünü tənzimləyən bazar iqtisadiyyatı
mühitinin yaradılması, iqtisadiyyatın strukturunun bazar
iqtisadiyyatının tələblərinə uyğun olaraq yenidən qurulması,
iqtisadiyyata investisiyaların, o cümlədən xarici investisiyaların
cəlb edilməsi, əhalinin həyat səviyyəsinin və sosial vəziyyətinin
yaxşılaşdırılması kimi məsələlər yer alırdı.
Sözügedən prosesdə qarşıda duran əsas məsələlərdən biri əvvəl
hakimiyyətdə olan müxtəlif qüvvələrin yol verdiyi səhvlərin aradan
qaldırılmasına nail olmaq idi. Bu məqsədlə özəlləşdirmənin
nəzəri-qanunverici bazasının hazırlanmasında ciddi nöqsanların
olduğunu nəzərə alan dahi rəhbər 1995-ci ilin yanvarında
özəlləşdirmənin aparılması üçün yaradılan dövlət qurumunun
rəhbərliyində dəyişikliklər etdi və 3 mart 1995-ci ildə dövlət
özəlləşdirilməsi haqqında proqramın hazırlanması üçün xüsusi
komissiya yaradılmasına göstəriş verdi. Həmin komissiya
1995-1998-ci illərdə özəlləşdirmənin aparılması üçün müvafiq sənəd
hazırlamalı idi. Bütün bu məsələlər Heydər Əliyevin təşəbbüsü və
rəhbərliyilə 1995-ci ilin martında Bakıda keçirilən hökumətin açıq
müşavirəsinə çıxarıldı. Əsas məqsəd isə proseslərin mahiyyətinin
ölkə ictimaiyyətinin nəzərinə çatdırılması və şəffaflığın təmin
edilməsi idi. Digər tərəfdən özəlləşdirmə ilə bağlı hazırlanan
dövlət sənədində ictimaiyyətin nümayəndələrinin də fikir və
təkliflərinin nəzərə alınmasına ayrıca diqqət yetirilirdi.
1995-ci ilin iyununda hazır olan sənəd əvvəlcə Azərbaycan
Prezidentinə təqdim olundu, onu qənaətbəxş hesab edən dövlət
başçısı iyunun 30-da təsdiq edilmək üçün Milli Məclisə göndərdi.
1995-1998-ci illərdə özəlləşdirmənin aparılması nəzərdə tutan
proqram dövlət mülkiyyətində olan əmlakın özəlləşdirilməsinin
təşkilati, iqtisadi və hüquqi əsaslarını əks etdirirdi. Dövlət
Proqramında mülkiyyətin özəlləşdirilməsi sahələri, istiqamətləri,
müddəti, mərhələləri və sair öz əksini tapmışdı. Mərhələlər üzrə
özəlləşdirmə bu cür nəzərdə tutulmuşdu: birinci mərhələ:
1996-1998-ci illər; ikinci mərhələ: 1998-2000-ci illər; üçüncü
mərhələ: 2000-2001-ci illər; dördüncü mərhələ: 2001-2005-ci illər.
Sözügedən sənəd 1995-ci il iyulun 21-də Milli Məclis tərəfindən
bəyənilərək qəbul edildi. Beləliklə, konkret proqram əsasında
Azərbaycanda dövlət mülkiyyətinin özəlləşdirilməsinə başlandı ki,
bu da yeni iqtisadi inkişaf mərhələsinin əsasının qoyulmasında
olduqca böyük rol oynadı. Sözügedən proqram Azərbaycanda sovetlər
dövrünün yadigarı olan planlı iqtisadiyyatdan bazar iqtisadiyyatı
sisteminə keçmək yolunda böyük əhəmiyyət kəsb etdi. Məhz bunun
nəticəsi idi ki, Azərbaycanda ümumi daxili məhsul 1996-cı ildə 1,3
faiz, 1997-ci ildə 5,8 faiz, 1998-ci ildə 10 faiz artdı. 1998-ci
ildə sənaye və kənd təsərrüfatı məhsulları istehsalında daha böyük
göstəricilər qeydə alındı. 1995-ci ilə qədər Azərbaycanın
iqtisadiyyatına, maliyyə sisteminə böyük zərbələr vuran
inflyasiyanın isə görülən tədbirlər nəticəsində qarşısı alındı və
tədricən aradan götürüldü. Hətta 1998-ci ildə Azərbaycanın milli
valyutasının - manatın dəyəri möhkəmləndi ki, nəticədə istehlak
mallarının qiymətlərinin azalması və deflyasiya müşahidə olundu. Bu
dövrdə Azərbaycana gələn xarici investisiyanın da həcmi durmadan
artırdı. Məsələn, 1998-ci ildə Azərbaycanın iqtisadiyyatına 1,5
milyard 500 dollar dəyərində investisiya qoyulmuşdu. Adambaşına
xarici investisiya qoyuluşunun miqdarına görə həmin vaxt Azərbaycan
Müstəqil Dövlətlər Birliyində birinci yerdə dururdu.
Bütün bunlar həm də 1998-ci ildə dünyanın əksər ölkələrini bürüyən
maliyyə böhranından Azərbaycanın yenə uğurla çıxmasına imkan
verirdi. Halbuki, həmin vaxt böhranın dünyanın aparıcı
dövlətlərinə, o cümlədən Rusiyaya böyük zərbələr vurması MDB
dövlətlərinin iqtisadiyyatına da dağıdıcı təsir göstərirdi.
Bunlarla yanaşı, dövlət idarəetmə sistemində də aparılan islahatlar
ölkənin inkişafı ilə bir həmahənglik təşkil edir və bu inkişaf
prosesini daha da sürətləndirirdi. Belə ki, iqtisadi islahatlarla
və özəlləşdirmə proqramının həyata keçirilməsi ilə bağlı
iqtisadiyyatı idarəetmə sahəsində ölkənin 20-dən çox nazirliyi,
dövlət komitəsi, konserni və şirkəti ləğv olunmuş, yaxud da yenidən
qurulmuşdur. Bir çox nazirliklərdə və idarəetmə orqanlarında
ayrı-ayrı qurumlar da ləğv edilmiş, yaxud da onların fəaliyyəti
bazar iqtisadiyyatı prinsiplərinə uyğunlaşdırılmışdı. Bütün bunlar
yekun nəticədə sürətli inkişafa xidmət edir və Azərbaycanın daha da
möhkəmlənməsinə gətirib çıxarırdı. 2000-ci ildə dövlət
mülkiyyətində olan əmlakın özəlləşdirilməsinin təşkilati, iqtisadi
və hüquqi əsaslarını müəyyən edən "Dövlət əmlakının
özəlləşdirilməsi haqqında" yeni Qanun qüvvəyə mindi. Qanunda qeyd
olunrudu ki, dövlət əmlakının özəlləşdirilməsinin əsas məqsədi
iqtisadiyyatın liberallaşdırılması, sahibkarlığın
genişləndirilməsi, rəqabət mühitinin formalaşdırılması,
iqtisadiyyata investisiyaların cəlb olunması yolu ilə onun
səmərəliyinin artırılmasına, struktur dəyişikliklərinə və əhalinin
həyat səviyyəsinin yüksəldilməsinə nail olmaqdan ibarətdir. Dövlət
əmlakının özəlləşdirilməsinin əsas prinsipləri isə qanuna əsasən
aşağıdakılar idi: özəlləşdirməyə dair tədbirlərin aşkarlıq
şəraitində həyata keçirilməsi və onun gedişi üzərində dövlət və
ictimai nəzarətin təmin edilməsi; dövlət əmlakının özəlləşdirilməsi
prosesində əmək kollektivinin qanunvericiliklə müəyyən olunmuş
mənafelərinin qorunması; sağlam rəqabət mühitinin
formalaşdırılması; özəlləşdirmə prosesində bütün alıcılar üçün
bərabər şəraitin yaradılması. Qanunun 5-ci maddəsində Azərbaycan
Respublikasında dövlət əmlakının özəlləşdirilməsinin Dövlət
Proqramı ehtiva olunurdu. Burada qeyd olunurdu ki, müəyyən dövr
üçün dövlət əmlakının özəlləşdirilməsinin həyata keçirilməsində
öncüllüklər (prioritetlər), məhdudiyyətlər, dövlət mülkiyyətinin
fiziki və hüquqi şəxslər tərəfindən alınması qaydası müvafiq icra
hakimiyyəti orqanı tərəfindən təsdiq olunan Dövlət Proqramında
müəyyən olunur.
Qanuna əsasən, Dövlət Proqramında dövlət əmlakının özəlləşdirilməsi
üsullarının seçilməsi, dövlət özəlləşdirmə paylarının (çeklərin)
istifadə olunması, özəlləşdirmə prosesində yerli və xarici
investorların (alıcıların) iştirakı, özəlləşdirilən dövlət
əmlakının haqqının ödənilməsi qaydaları, eləcə də müəssisə və
obyektlərin özəlləşdirməqabağı restrukturizasiyası və
sağlamlaşdırılması; özəlləşdirilən dövlət müəssisəsində əmək
kollektivinə verilən güzəştlər; dövlət əmlakının özəlləşdirilməsi
ilə bağlı digər məsələlər əksini tapırdı.
"Dövlət əmlakının özəlləşdirilməsi haqqında" Qanunun icrasını təmin
etmək, iqtisadiyyatda aparılan struktur islahatlarını,
sahibkarlığın inkişafını və sağlam rəqabət mühitinin
formalaşdırılmasını sürətləndirmək, iqtisadiyyata investisiyalar
cəlb etmək yolu ilə onun səmərəliliyinin artırılmasına nail olmaq
məqsədi ilə 2000-ci il avqustun 10-da Heydər Əliyev tərəfindən
"Azərbaycan Respublikasında dövlət əmlakının özəlləşdirilməsinin II
Dövlət Proqramı" təsdiq edilməsi barədə Fərman verildi. Fərmanın
mühüm cəhətlərindən biri "Azərbaycan Respublikasında 1995-1998-ci
illərdə dövlət mülkiyyətinin özəlləşdirilməsinin Dövlət
Proqramı"nın həyata keçirilməsi prosesində yol verilmiş qanun
pozuntularının aradan qaldırılması və təqsirkar şəxslərin
məsuliyyətə cəlb edilməsi üçün qanunvericiliyə uyğun olaraq müvafiq
tədbirlər görülməsi, bu barədə Azərbaycan Respublikasının
Prezidentinə ətraflı məlumat verilməsi haqda Nazirlər Kabineti
qarşısında konkret tapşırıq qoyulması idi. Bundan başqa Fərmana
əsasən, dövlət mülkiyyətinin özəlləşdirilməsi ilə bağlı I Dövlət
Proqramına uyğun olaraq özəlləşdirilməyə açıq elan edilmiş, lakin
özəlləşdirilməsi başa çatmamış müəssisə və obyektlərin II Dövlət
Proqramı çərçivəsində özəlləşdirilməsi barədə təkliflər
hazırlanmalı idi.
Elşən BAYRAMOV
(ardı var)
Yazı Azərbaycan Respublikasının
Prezidenti yanında Kütləvi İnformasiya Vasitələrinin İnkişafına
Dövlət Dəstəyi Fondu tərəfindən maliyyələşdirilən "Regionların
sosial-iqtisadi inkişafının təşviq edilməsi" layihəsi çərçivəsində
çap olunub.