İsmayıllıda vəziyyət nə yerdədir?
24 Yanvar 2013 11:40 (UTC+04:00)
"Hazırda İsmayıllı rayonunda tam sakitçilikdə.
Polis hadisələrə tam nəzarət edə bilir. Hami adi günlərdə olduğu
kimi öz işlərilə məşğuldurlar. Heç bir narazılıq yoxdur. İstər İcra
Hakimiyyəti binasının qarşısında, istərsə də, polib şöbəsinin
qarşısında toplaşan yoxdur". Bu barədə İsmayıllı rayon Polis
Şöbəsinin rəisi Nizami Qocayev ANS PRESS-ə açıqlamasında
bildirib.
Rəisin sözlərinə görə, İsmayıllıda baş verən
insidentlə bağlı "Çıraq" hotelinin administratoru Emil Şəmsəddinov
və istirahət etmək üçün onunla birgə rayona gələn Elməddin Məmmədov
saxlanılıb. Hazırda araşdırma aparılır.
Xatırladaq ki, ötən axşam saat 22.20 radələrində
İsmayıllı şəhərində insident baş verib. Yüksək sürətlə hərəkət edən
"Chevrolet Camaro" avtomobili şəhərə girişdəki yol ayırıcında
dairəyə çırpılıb. Avtomobilin içindən bir neçə gənc çıxıb və hadisə
yerinə yığılan yerli əhali onların arasında Emil və Vüqarı
tanıyıblar. Bunlar yaxınlığda yerləşən "Çiraq" Motelinin meneceri
ve onun dostları olub.
Hadisə yerinə toplaşan əhalinin sözlərinə görə,
yardım etmək məqsədi ilə toplaşan İsmayıllı sakinləri motelin
meneceri Emil tərəfindən qəzəblə qarşılanıb və o toplaşanları
əxlaqsız və təhqiramiz söyüşlərlə təhqir edib.
Bu ifadələrə dözməyən bir sıra yerli sakin Emil
ilə Vüqara etirazlarını bildirərək, onları sakit olmağa çağırıblar.
Lakin buna cavab olaraq motel meneceri Emil toplaşanları "Makarov"
tipli tapanca ilə hədələyib, yenidən təqqir edib. Sakinlərin
dediyinə görə, ətrafdakılar silahlı və sərxoş adamların xətasından
qorxub onları tərkisilah ediblər, Emil ilə Vüqarı döyüblər.
Qışqırıq və söyüşlərə hadisə yerinə insanlar yığışmağa başlayıb.
Döyülmüş və xəsarət almış motel meneceri və onun dostları hadisə
yerindən qaçmağa müfəffəq olublar. ANS PRESS-in hadisə yerindəki
əməkdaşlarının məlumatına görə, xəsarət alanlardan biri rayon
xəstəxanasında, digərləri isə polis idarəsində sığınacaq
tapıblar.
Fakt üzrə Cinayət Məcəlləsinin müvafiq maddələrilə
Baş Prokurorluğun Ağır Cinayətlərə dair işlər üzrə istintaq
idarəsində cinayət işi başlanıb, istintaq aparılır.