Lisenziyasız stomatoloji kabinetlər virus ocaqlarıdır
24 Yanvar 2013 14:15 (UTC+04:00)
"Bakı ətrafındakı qəsəbə və kəndlərdə sanitar-gigiyenik tələblərin
yerinə yetirilməsi üçün şərait olmayan, alətlərin
sterilizasiya edilməsi üçün xüsusi aparat olmayan stomotoloji
kabinetlər lisenziyasız fəaliyyət göstərənlərdir". Bu sözləri
Movqe.az-a açıqlamasında Respublika Stomatoloji Mərkəzinin baş
həkimi Kamran Aslanov söyləyib. K. Aslanov ötən il respublika üzrə
stomotoloji kabinetlərin fəaliyyətinin yoxlanıldığını, bu barədə
hazırlanan arayışın Səhiyyə Nazirliyinə təqdim edildiyini söylədi.
Onun sözlərinə görə, müvafiq qaydalara əsasən stomotoloji kabinet
açmaq istəyən şəxslər bunun üçün Səhiyyə Nazirliyinə müraciət
edirlər. K. Aslanov nazirliyin əməkdaşlarının həmin stomotoloji
kabinetə baxış keçirdiklərini, gigiyenik-sanitar vəziyyət,
alətlərin sterilizasiyası üçün aparat olduğu təqdirdə həmin
kabinetin fəaliyyəti üçün lisenziya verildiyini bildirdi.
Qeyd edək ki, stomotoloji kabinetlərin fəaliyyətləri hər il
yoxlanılsa da, xüsusilə paytaxtın ətraf qəsəbə və kəndlərində
sanitar-gigiyenik tələblərə cavab verməyən, hətta təhlükəli
virusların yayılması üçün münbit şəraiti olan stomotoloji
kabinetlər hələ də əhaliyə "xidmət" göstərir. Bu cür stomotoloji
kabinetlərdə hətta alətlərin steril edilməsi üçün aparat belə
yoxdur. Movqe.az-ın əməkdaşının apardığı kicik araşdırma zamanı
bəlli olub ki, 7-ci Binəqədi şossesinin alt hissəsində yerləşən
stomotoloji kabinet ərazidəki sakinlərə sterilizasiya aparatı
olmadan xidmət göstərir. Kabinetin stomotoloqu xəstələrə bildirir
ki, alətləri digər iş yerində, steril edərək gətirdiyindən hər
hansı təhlükəli virusun digər xəstəyə kecməsindən söhbət gedə
bilməz. Qeyd edək ki, qəsəbə və məhəllələrdə fəaliyyət
göstərən stomotoloji kabinetlərin stomotoloqlarının
əksəriyyəti alətlərin sterilizasiyasını birinci iş yerində aparır.
Vaxt məhdud olduğundan, günün ikinci yarısında müştəriləri
tez-tələsik yola salmağa can atan stomatoloqlar, əksər
hallarda gigiyenik tələblərə başdan sovdu yanaşaraq hepatit,
hətta QİCS kimi təhlükəli infeksiyaların yayılmasına şərait
yaradırlar.
Qeyd edək ki, anoloji təhlükə artıq lisensiyasız fəaliyyət göstərən
stomotoloji kabinetlərin mütləq əksəriyyətində müşahidə olunur.
K.Aslanov isə deyir ki, belə halların qarşısının alınması üçün
ərazi sanitar epidemioloji stanasiyalar ayıq-sayıq olmalı,
lisenziyasız fəaliyyət göstərən stomotoloji kabinetlərin
fəaliyyətini dərhal dayandırmalıdırlar: "Belə stomotoloji
kabinetlər virus ocaqlarıdır. Mən əhaliyə müraciət edirəm ki,
lisenziyası olmayan stomatoloji kabinetlərin fəaliyyətindən
yararlanmasınlar. Stomotoloji kabinetə girərkən Səhiyyə
Nazirliyinin lisenziyasını tələb etsinlər. Əslində bu lisenziya
stomotoloji kabinetdə görünən yerdə divardan vurulmalıdır ki,
xəstənin narahatçılığına əsas qalmasın. Hansı stomatoloji kabinetdə
bu lisenziya vurulmayıbsa xəstələr bilməlidirlər ki, orada həyat və
sağlamlıq üçün təhlükəli olan QİCS, Hepatitin müxtəlif növlərinə
yoluxa bilərlər. Çünki belə kabinetlərdə alətlərin steril olduğuna
heç bir qurum zəmanət vermir".
K. Aslanov selikli qişa ilə təmasda olan tibbi alətlərinin
sterilizasiya edilməməsi üzündən hamilə qadınların, azyaşlı
uşaqların belə bu təhlükəli virusların daşıyıcılarına çevrilmə
ehtimalının böyük olduğu barədə xəbərdarlıq etdi.