Yuxarı sinif şagirdləri arasında narkotik maddə istifadəçilərinin sayı artıb
25 Yanvar 2013 15:45 (UTC+04:00)
Bakının ətraf kəndlərindəki orta məktəblərə narkotik maddələrin
kecirilməsinin qarşısının alınması üçün izləyici kameralar
quraşdırılır. Movqe.az-a daxil olan məlumata görə, artıq əksər orta
məktəblərin girişlərində təhsil müəssisələrinə daxil olanların,
məktəbin həyətində, yaxınlığında şagirdlərlə təmasda olanların
izlənməsi kameralar vasitəsilə aparılır. Kameraların əsasən
paytaxtın Binəqədi rayonu ərazisindəki orta məktəblərə
quraşdırıldığı barədə məlumat verilir. Yuxarı sinif şagirdlərinin
narkomaniyanın qurbanı olmasını əngəlləmək məqsədilə aparılan bu
işlərin, yaxın vaxtlarda bütün Bakı məktəblərini əhatə edəcəyi
bildirilir. Qeyd edək ki, son vaxtlar ölkədə narkotik vasitələrin
istifadəçilərinin yaş senzində azalma müşahidə olunmaqdadır. Çox
təəssüf ki, məktəblilərin də bu bəlaya düçar olması halları istisna
deyil. Bunu səhiyyə nazirinin müavini Elsevər Ağayev də
təsdiqləyir. Nazir müavini öz çıxışında bildirib ki, Azərbaycanda
məktəblilər arasında da narkotik vasitələrdən istifadə edənlər var:
"Ölkədə məktəblilər arasında da narkotik vasitələrdən istifadə
edənlər var. Bu bizi narahat edir. Bunun qarşısını almaq üçün
məktəblərdə təbliğat işləri aparılmalı və bu işə valideynlər,
cəmiyyət cəlb olunmalıdır".
Məktəb yaşlı uşaqlar arasında narkotik maddə istifadəçilərinin
statistikası açıqlanmasa da, bu faktın olduğu danılmır. Bakı Şəhəri
üzrə Təhsil İdarəsinin ictimaiyyətlə əlaqələr şöbəsinin rəhbəri
Zəminə Əliqızı isə orta məktəblərdə narkomaniyaya qarşı mübarizə
tədbirlərinin aparılmasının hüquq mühafizə orqanlarının işi
olduğunu söylədi: "Orta məktəblərə izləyici kameraların
quraşdırılması məktəb direktorunun keçirilən dərsləri izləməsi üçün
əlverişlidir. Amma məktəb yaşlı uşaqları bu bəladan qorumaq təhsil
işçilərinin işi deyil. Təbii ki, orta məktəblərdə şagirdlərə
narkotik maddələrin istifadəsinin hansı bəlalara yol açdığı barədə
marifləndirici tədbirlər keçirilir. Demək olar ki, məktəblilərin
çoxu narkotik maddələrdən istifadənin sonunun necə
nəticələndiyindən məlumatlıdırlar. Amma məktəb şagirdi
narkomanların təsirinin altına düşməkdən qoruya bilməz. Çünki,
şagirdin gününün 5-6 saatı məktəbdə keçir. Valideynlər də öz
uşaqlarını bu bəladan qorumaq üçün başa salmalı, onun fəsadları
barədə öz övladları ilə söhbət etməlidirlər. Amma təbii ki,
uşaqların keçid dövrü, yeniyetməlik dövrü, məktəbdə təhsil aldığı
vaxta təsadüf etdiyindən, bu yaşda uşaqlar ətrafdan özlərinə qarşı
edilən diqqətlərə laqeyid münasibət göstərmirlər. Ona görə, də
xüsusilə 15-16 yaş dövründə oğlan uşaqlarının narkotik vasitələrin
istifadəsi, alqı-satqısı ilə məşğul olanların əhatəsinə düşmək
riski böyük olur. Valideynlər də övladlarının bu yaş dövründə
onlara diqqət göstərməli, onların kimlərlə dostluq etdiyini,
dərsdən sonra asudə vaxtını kimlərin əhatəsində keçirdiklərinə
nəzarət etməlidirlər".
Narkotiklərə dair Milli Təbliğat Ofisinin rəhbəri Məzahir Əfəndiyev
isə deyir ki, təəssüfedici hal olsa da, orta məktəblərin yuxarı
sinif şagirdləri arasında narkotik maddə istifadəçilərinin sayı
çoxalıb: "Bu danılmaz faktdır ki, orta məktəblərin üst siniflərində
narkotik maddələrin istifadəçisinə çevrilmiş şagirdlər var. Düzdür
orta məktəblərə, məktəblərin giriş-çıxışlarına kameraların
quraşdırılması şagirdlərin bu bəlanın qurbanına çevrilməsinin
qarşısını müəyyən mənada ala bilər. Ən azından narkotik maddələrin
alqı-satqısı ilə məşğul olanlar təhsil müəssisələrinin ətrafında
özlərinə müştəri toplamaqda çəkinərlər. Amma bu müəyyən mənada
tövhə verə bilər. Yenədə məktəblilər narkomaniyanın necə bəla
olduğu barədə məlumatlandırılmalıdırlar ki, onlar narkotika
alverçilərinin toruna düşməsinlər. Düzdür, hazırda məktəblərdə belə
marifləndirici tədbirlər keçirilir. Amma kameraların
quraşdırılması, hüquq-mühafizə orqanlarının tədbirləri ilə yanaşı
yenədə hədəf orta məktəblərdə narkomaniyanın acı fəsadlarına
yönəlik təbliğat-təşviqat işlərinin aparılması olmalıdır":
M. Əfəndiyevin sözlərinə görə, statistik rəqəmlər narkomaniyanın
qurbanlarının yaşının ili-ildən cavanlaşdığını göstərir: "Bu
təhlükədən xəbər verir. İslah-əmək müəssisələrində narkotik
maddələrin alqı-satqısına görə cəza çəkənlərin 35 faizi gənclərdir.
Onların arasında orta məktəb vaxtından narkotik maddələrin
istifadəsinə qurşanıb sonradan narkotik maddələrin alqı-satqısı ilə
məşğul olanlar da var. Ona görə də, məktəb yaşlı yuxarı sinif
şagirdlərinin narkomaniyanın qurbanına çevrilməsinin qarşısını
almaq üçün təxirəsalınmaz tədbirlər görülməlidir".