Orta məktəblərə keçid kartla olacaq

7 Fevral 2013 13:18 (UTC+04:00)
Yaxın vaxtlarda orta məktəblərə giriş-çıxış yalnız çip kartlarla mümkün olacaq. Bu barədə məlumatı Movqe.az-a Təhsil Sisteminin İnformasiyalaşdırılması İdarəsinin Treninq və monitorinq şöbəsinin direktoru  Ramil Süleymanov verib. Onun sözlərinə görə, bu təhsil sisteminin elektronlaşdırılması layihəsində nəzərdə tutulsa da, orta məktəb şagirdlərinə elektron kartların verilməsi maliyyənin olmaması səbəbindən hələki saxlanılıb: "Hazırda 50 təhsil müəssisəsi elektron məktəb layihəsinə qoşulub. Həmin məktəblərdə mühafizə elektron sistemlə təmin olunub. Orta məktəblərdə quraşdırılmış kameralar vasitəsilə məktəbə girib-çıxanlara nəzarət edilir. Bu sistemlə dəvamiyyətə də nəzarət mümkündür. Amma layihədə  nəzərdə tutulmuşdu ki, məktəbə  kənar şəxslərin daxil olmasını əngəlləmək üçün qapının girişində kartla keçid üçün sistem quraşdırılsın. Və orta məktəblərə giriş-çıxış kartla tənzimlənsin. Maliyyə olmadığından kartların hazırlanması saxlanıldı. Amma maliyyə ayrılsa orta məktəblərə giriş-çıxışın elektron kart sisteminə keçməsi üçün çip kartlar hazırlanacaq".
R. Süleymanov "Gələcəyə baxış konsepsiyası" nda respublikanın bütün orta ümumtəhsil məktəblərinin elektronlaşdırılmasının nəzərdə tutulduğunu, məktəblərə giriş üçün elektron kartlardan istifadə ediləcəyini bildirdi.