Çingiz Qənizadədən qanuna dəyişikliyə etiraz edənlərə sərt cavab :"Savadsızdırlar ona görə"

7 Fevral 2013 16:37 (UTC+04:00)
"Onlar aidiyyatı icra orqanı sözünü rayon icra hakimiyyəti ilə səhv salıblar. Ona görə belə danışırlar. Deyirlər ki, biz niyə rayon icra hakimiyyətinə aldığımız qrantla bağlı hesabat verməliyik ki?  Savadsızdırlar ona görə".
Bu sözləri Milli Məclisin deputatı Çingiz Qənizadə "Dini etiqad azadlığı haqqında" qanuna edilən dəyişiyə etiraz edən QHT rəhbərlərinə ünvanlayıb. Movqe.az-a danışan millət vəkili nədənsə QHT-lərin, bəzi təşkilat, komitə rəhbərlərinin qrantların xərclənməsində şəffaflığa xidmət edən dəyişikliyə qarşı çıxdıqlarını söylədi: "Bu dəyişiklik QHT-lərin, partiya və  fondların qrant almaq hüququnu məhdudlaşdırmır. Qanundakı dəyişiklik onlara əngəl yaratmır. Sadəcə tələb edir ki, aldıqları qrantı hara, necə xərclədikləri barədə hesabat versinlər. Qrantı aldıqda pulu verən təşkilatla müqavilə bağlasınlar ki, pulu hardan alıb nəyə xərclədikləri şəffaf görünsün. Bir sözlə bu məsələdə şəffaflıq olmasını istəyirik. Bunun nəyi pisdir ki, narazılıq edirlər".
Qeyd edək ki, bundan sonra qeyri-hökumət təşkilatları, fondlar, ictimai təşkilatlar, siyasi partiyalar qrant müqaviləsi olmadan və ya qrant haqqında rəsmi qərar olmadan yardım qəbul edə bilməyəcəklər. Bu dəyişikliklər ölkədə fəaliyyət göstərən dini qurumlara da şamil olunacaq. "Dini etiqad azadlığı haqqında" qanunun 24-cü maddəsinə edilən əlavəyə əsasən, dini qurum qəbul etdiyi və ya vəd edilən ianə müqabilində ianə verən şəxsə və ya hər hansı digər şəxsə birbaşa yaxud dolayı yolla maddi və sair nemət, hər hansı imtiyaz və ya güzəşt verə, belə təkliflə çıxış edə və ya vəd verə bilməz. Dini quruma ianə verən şəxs verdiyi və verəcəyi ianə müqabilində özü və ya üçüncü şəxslər üçün birbaşa və yaxud dolayı yolla maddi və sair nemət, imtiyaz, güzəşt qəbul edə bilməz, təklifə razılıq verə bilməz. Burada əsas məqsəd əldə olunan ianələrin çirkli pullar qismində dövr etməsinin qarşısını almaq, eləcə də xarici missionerlərin fəaliyyətində dövr edən vəsaitin zərərli istiqamətə yönəlməsinin qarşısını almaq məqsədi daşıyır. Bununla belə, 200 manatadək ianə və ya qrantın rəsmiləşdirilməsi məcburi deyil. Adıçəkilən təşkilat və qurumlar isə əldə etdikləri ianə və qrantların məbləği, eləcə də vəsaitin xərclənmə istiqaməti ilə bağlı Maliyyə Nazirliyinə hesabat verəcək. Bəzi QHT rəhbərləri bu dəyişikliyin əleyhinə bəyanatlar səsləndirirlər.