Azərbaycanda adların qoyulmasına xüsusi nəzarət ediləcək

8 Fevral 2013 13:08 (UTC+04:00)

Bu ildən Azərbaycanda yeni adların qoyulmasına xüsusi nəzarət ediləcək. Bu barədə APA-ya Nazirlər Kabineti yanında Terminologiya Komissiyasının sədr müavini Sayalı Sadıqova bildirib.
Onun sözlərinə görə, artıq bununla bağlı Terminologiya Komissiyası müvafiq dövlət qurumlarına təkliflər hazırlayıb: "Bir müddət əvvəl Azərbaycanda uşağa Cəllad adı qoymuşdular. Belə bir adın qoyulması nə dərəcədə uyğundur? Valideynlər belə ad qoyanda hara baxırlar?"
S. Sadıqova deyib ki, yaxın zamanlarda Terminologiya Komissiyasının nəzdində yaradılacaq Adlar və Soyadlar Bölməsi ölkədə mövcud olan adların tam siyahısını hazırlayacaq. Bu siyahı bütün VVAQ idarələrinə göndəriləcək: "Bizi iki və üç pilləli adların verilməsi daha çox narahat edirdi. Belə adların qoyulmasına icazə verilməyəcək. Mariya, Yekaterina, Olya, Alya kimi rus adlarının qoyulmasına da icazə verilməyəcək. Bununla yanaşı, əhali arasında maarifləndirmə də aparılacaq. Hazırda Ədliyyə Nazirliyinin adlar siyahısında 80 minə yaxın ad var. Xalq özü də ad yaradıcılığı ilə məşğuldur. İndiyə qədər Dəniz, Dərya, Yağmur, Uğur kimi adlar o qədər də yox idi. Amma bu adlar dildə yaxşı səslənir, onların verilməsində heç bir qəbahət yoxdur".