İran Prezidenti Mahmud Əhmədinejad Qahirədə səfərdə olduğu müddət ərzində ikinci dəfə Suriya müxalifətinin müttəfiqləri tərəfindən hücuma məruz qalıb.Bu barədə "əl-Arabia" məlumat yayıb.
M.Əhmədinejad İran diplomatlarının birinin evində təntənəli qəbul mərasimində iştirak edib. Bu zaman mərasim iştirakçıları arasına necə keçdiyi məlum olmayan aqressiv əhval-ruhiyyəli bir vətəndaş ona tərəf yüyürüb.
Prezidentin mühafizəçiləri və Qahirə polisinin əməkdaşları M.Əhmədnejada çatmağa bir neçə metr qalmış onu saxlaya biliblər. İran lideri xəsarət almayıb.
Saxlanılan şəxsin qərəzli yaxınlaşması onun sözlərindən aydın olub. Həmin şəxs prezidentə tərəf qaçarkən: "M.Əhmədinejada ölüm, Bəşər Əsədə ölüm!" deyə qışqırıb.
Onu tutan mühafizəçilər üzərində axtarış aparıblar. Onun üzərində hər hansı silah aşkar edilməyib. "əl-Arabia"nın məlumatına görə, M.Əhmədinejadın iranlı mühafizəçiləri onu özləri saxlamaq və sorğu-sual etmək istəyiblər, amma misirlilər saxlanılan şəxsin yaxınlıqdakı polis bölməsinə aparılmasını təkid ediblər. Hücum edənin adı və milli mənsubiyyəti barədə hələlik məlumat verilmir.
Xatırladaq ki, iki gün bundan əvvəl İran prezidenti Qahirədə ona ayaqqabı atan naməlum şəxslərin hücumuna məruz qalıb. Prezidentə atılan çəkməni mühafiəçilər tutub.
M.ƏhmədinejadQahirədəkeçirilən İslam Əməkdaşlığı Təşkilatının (İƏT) sammitinə yollanan İran nümayəndə heyətinə rəhbərlik edir.