İranın Azərbaycandakı səfirliyi yazıçı Rafiq Tağıya qarşı
törədilmiş sui-qəsddə İranın adının hallanmasına münasibət
açıqlayıb. Səfirliyin mətbuat xidmətindən daxil olan açıqlamada
deyilir: "Rafiq Tağıya qarşı törədilmiş sui-qəsd olayının İran
İslam Respublikasına aid edilməsi ilə bağlı bəzi şəxslər və
Azərbaycan Respublikasının bəzi informasiya vasitələri tərəfindən
irəli sürülən əsassız və həqiqətdən uzaq iddiaları təkzib edirik.
Bununla yanaşı, mənfi atmosfer yaratmaq məqsədi daşıyan bu əməlləri
İran İslam Respublikası və Azərbaycan Respublikası arasındakı
strateji münasibətlərə xələl vurmaq istiqamətində sionizm-Amerika
təxribatları kimi qiymətləndirir, bu kimi cəhdləri puç və məğlub
addım hesab edirik".
Qeyd edək ki, Rafiq Tağı noyabrın 19-da paytaxtın Xətai
prospektindəki dayanacaqda naməlum şəxslər tərəfindən bıçaqlanıb.
Ağır vəziyyətdə xəstəxanaya yerləşdirilən yazıçı əməliyyat
olunub.