BBC-nin verdiyi məlumata görə, Amerika Birləşmiş Ştatlarında həkimlər HİV virusu ilə doğulmuş körpəni erkən mərhələdə adi dərmanların köməyilə sağaltmağa nail olublar.
Bu haqda Con Hopkins Universitetinin alimləri, 3 mart tarixində keçirilmiş konfransda məlumat veriblər. Həkimlər iddia edirlər ki, Missisipi ştatında 2010-cu ildə HİV virusu ilə doğulan qız uşağını adi dərman terapiyası ilə sağaldıblar.
Körpəyə standart antiretrovirus terapiyası ilə eyni vaxtda 3-4 güclü təsiredici dərman təyin edilib. Körpəyə müalicəni həyatının ilk 30 saatında başlayıblar. Halbuki, HİV viruslu uşaqlara terapiya doğuşdan, yalnız 4-6 həftə sonra həyata keçirilir.
Hal-hazırda qızın 2,5 yaşı var və o, artıq bir ildir ki, dərman qəbul etməsə də, özünü sağlam hiss edir.
HİV-lə doğulan digər uşaqlara da bu cür müalicənin effektiv olub-olmayacağını araşdırmaq üçün Universitetdə daha bir sıra təcrübələrin keçirilməsinə hazırlaşırlar.
Əgər qız sağlam qalsa, bu, insan immunçatışmazlığı virusundan sağalma tarixində qeydə alınmış ikinci hadisə olacaq.
Birinci HİV-dən sağalma hadisəsi 2007-ci ildə Berlində qeydə alnıb. Belə ki, həmin vaxt həkimlər virusa yoluxmuş kişiyə sümük iliyi köçürməli olmuşdular.