Mürəkkəbçiçəklilər fəsiləsinə aid olan çobanyastığı yol kənarlarında və boş ərazilərdə özbaşına bitən xoş ətrə malik sarı-ağ rəngli çiçəklər açan bir bitkidir. Bu bitkinin çiçəklərindən müalicə – profilaktik və kosmetik məqsədlə dünyanın bir çox ölkələrində istifadə edilir.

Çobanyastığının faydalarından danışarkən, ilk növbədə onun antiseptik, ağrıkəsici, antiallergetik, antiiltihab, sakitləşdirici vasitə olduğunu qeyd etmək lazımdır. Çobanyastığının dəmləməsi mədə-bağırsaq, dəri, ağız boşluğu, tənəffüs yolları, qadın xəstəlikləri və digər xəstəliklər zamanı çox xeyirlidir. Ondan həmçinin irinli yaraların, xoraların yuyulmasında, göz xəstəliklərinin müalicəsində də istifadə edilir.

Çobanyastığı iştahanı açır, sinirləri sakitləşdirir, baş, bel və diş ağrıları zamanı müsbət təsir göstərir. Sidikqovucu, hərarətsalıcı və mikroböldürücü xüsusiyyətlərə malikdir.

Çobanyastığının çayı və yağı tibbdə çox istifadə edilir. Çobanyastığı çayı dərini təmizləmək və təravətli etmək baxımından da çox faydalıdır. Bu çayla gözə kompres etmək gözdəki şişkinliyi aradan qaldırır. Çobanyastığı dəmləməsi ilə vanna qəbul etmək bədənin dərisinə mikroböldürücü təsir göstərir. Saçları bu dəmləmə ilə yumaq onlara  parlaqlıq verir.

Çobanyastığı yağı ağrıların müalicəsində də istifadə olunur. Əsasən də uşaqların qarın nahiyəsindəki sancı, ağrı (ağrı əsasən köp zamanı olur) zamanı çobanyastığı yağı isidilir və əllə qarın nahiyəsi yüngül masaj edilir. Çobanyastığını qaynadıb buxarı ilə tənəffüs etmək soyuqdəymə və sinusitdə  xeyirlidir.