Britaniyada qeyri-adi hovuzlar inşa ediləcək. Londonda məskunlaşan zənginlər üçün nəzərdə tutulan bu hovuzların özəlliyi onların yerdə yox, səmada olmasıdır. "Sky pool" (səma hovuzu) ideyası Londonun bahalı məhəllələrində mənzil sahibi olmaq istəyən müştərilərin sayının artması ilə bağlıdır. Məhz zəngin müştərilərin diqqətini çəkmək üçün bu cür qeyri-adi yeniliyə imza atılır.

Movqe.az xarici mətbuata istinadən xəbər verir ki, bu hovuzların 2018-ci ildə Londonun mərkəzində istifadəyə verilməsi planlaşdırılır. Hovuzlar iki yaxın məsafəli binanın üst mərtəbələrinin arasında tikiləcək. Hər tərəfi şəffaf şüşə ilə örtülmüş bu hovuzlarda insan özünü sanki səmada üzürmüş kimi hiss edəcək. İki bina arasında körpü təəssüratı yaradan hovuzların uzunluğu 25 metr, eni 5 metr, dərinliyi 3 metr olacaq.

"Embassy Gardens" şirkətinin hazırladığı bu hovuzlara sahib olan mənzillərin qiyməti ən azı 1 milyon avro olacaq.