Azərbaycanda orta məktəblərdə altı günlük təhsil sistemi ləğv edilib. Movqe.az-ın əldə etdiyi məlumata görə, Təhsil Naziri Mikayıl Cabbarov ümumtəhsil müəssisələrini yeni iş qrafikini müəyyənləşdirib. Belə ki, bundan sonra bütün məktəblər beş günlük iş rejimində çalışacaqlar. Nazirin yeni qərarı artıq paytaxtın bütün məktəblərində tətbiq olunmağa başlayıb. Məktəblərdən şagirdlərə bildirilib ki, altı günlük iş sistemi ləğv olunduğundan,  məktəblər həftənin altıncı günü bağlı olacaq. Yeni rejimlə əlaqədar orta məktəblərdə dərs proqramları da beş günlük iş rejiminə uyğunlaşdırılıb. Təhsil Nazirliyindən isə Movqe.az-a xəbəri təsdiqləyərək bildiriblər ki, artıq ümumtəhsil müəssisələrinin əksəriyyətində altı günlük dərs sistemi ləğv eidlib. Həftənin altı günü dərs keçirilən məktəblərdə də tədricən beş günlük sistemə keçidə başlanılıb. 

Qeyd edək ki, hazırda paytaxtda orta məktəblərin əksəriyyəti beş günlük iş qrafiki ilə işləsə də, bu günədək həftənin altıncı günü də dərs keçirilən məktəblər qalmaqda idi.