"Əsgər Abdullayev istefa verməyib". Bunu Apasport.az saytına
"Turan" klubunun prezidenti Musa Süleymanov deyib.
Premyer Liqanın XIII turunda "Bakı"nın qonağı olan "Turan" cari
mövsümdə ən acı məğlubiyyətlə barışmalı oldu. Qapısından 5 cavabsız
top buraxan Tovuz təmsilçisi rəqibin 3 xal qazanmasını seyr edib.
Görüşə əvəzedici heyətin üzvləri ilə çıxan "Turan"da baş məşqçi
Əsgər Abdullayev oyunu texniki zonadan deyil, tribunadan izləyib.
Maraqlıdır ki, cəzalı olmayan çalışdırıcının əvəzinə protokolda
köməkçisi Eltay Aslanovun adı yazılmışdı.
Baş verənləri klub rəhbəri belə izah edib: "Əsas heyət çıxmadığına
görə, özüm Əsgər Abdullayevin komandanın "sükanı arxası"nda
olmasını istəmədim. Dedim, qoy əvəzedicilərin məşqçisi komandaya
rəhbərlik etsin".
Maddi planda heç bir irəliləyişin olmadığını qeyd edən Süleymanov
son vaxtlar klubla bağlı səsləndirilən fikirlərə də münasibət
bildirdi: "Hər şey pulun başındadır. "Turan"ın halına acıyanlar
komandaya pul versinlər. Heç kim yaxın durmur. Ona görə maddi
cəhətdən vəziyyətimiz hələ pisdir".
O, dekabrın sonlarında klubu buraxa biləcəyini də istisna etməyib:
"Ola bilsin, dekabrda klubu buraxdım. Tək çatdıra bilmirəm. Hər bir
futbolçunun da öz problemləri var. Bu qədər pul xərcləməyin
qarşılığında yenə söyüş yiyəsi olursan. Kim istəyir, buyursun,
komandaya baxsın".