Sentyabrın 26-dan oktyabrın 4-dək Belçikada və Niderlandda qadın voleybolçular arasında Avropa çempionatı keçiriləcək.Movqe.az Goal.az-a istinadən məlumat verir ki, çempionatda mübarizə aparacaq Azərbaycan millisinin heyəti müəyyənləşib. Komandamızın heyətində əvvəlki yarışlarla müqayisədə müəyyən dəyişikliklər olub. Belə ki, hücumçu Yana Ağayeva, blokçu Yelena Parxomenko və toppaylayıcı Natəvan Qasımova əsas heyətə salınmayıb. Baş məşqçi Faiq Qarayev əsas heyətdə hücumçular - Polina Rəhimova, Odina Bayramova, Yekaterina Jidkova, Marqarita Əzizova, blokçular - Kseniya Poznyak, Ayşən Abduləzimova, Aynur Kərimova, toppaylayıcılar - Oksana Kurt, Kristina Yaqubova, liberolar - Valeriya Məmmədova, Oksana Kiselyova və Ceyran Əliyevaya yer verib.